Atualità
Jonta provinziela renunzia a 150 milion de chëutes
USP - Feter 150 milion de euro fej ora la chëutes sëuraprò che la Jonta provinziela pudëssa tò ite, ma ne l fej nia per no ti ciarië su pëis ai zitadins. Chësc ie unì dat pro ncuei (25 utober) dajan pro definitivamënter la pruposta de lege sun bilanz cun lege finanziera 2011. I majeri capituli fej ora la chëutes IRAP y IRPEF.
I ultimi particuleres dl bilanz 2011 cun lege finanziera ie mo stai sun mëisa de descuscion. Pont zentrel ie tlo stat la puscibltà de njontes de chëuta che ie pona unides lascedes demez. “Ncuei ons fat ora de purté dant al Cunsëi provinziel de tò demez la chëuta sun l davani IRPEF per chiche davania manco de 15.000 euro al ann” à dit l presidënt Durnwalder. Per la Provinzia fej chësc ora de ndut 8 milion de euro demanco, ma dal’autra pert n pëis demanco per feter 93.000 zitadins, feter 90% dependënc y zitadins n pension.
L renunzië ala njonta IRPEF ie unida trateda mo n idea ajache sindacac y pensionisć ova fat la pruposta de na rata de pension da sëuraprò da Nadel per 7000-10000 pensionisć che giapa la minima. “Chësta pruposta ne ie nia unida azeteda ajache per chësta persones iel ti ultimi mënsc bele unì fat miuramënc, sciche n cont del sustëni speziei per l sciaudé o l minima de vita, la pension per invaliditeies y sustëni ala families” à spiegà Durnwalder.
Sce n cumpëida adum duta la chëutes che la Provinzia pudëssa tò ite, ma renunzieia, ruva l presidënt sun feter 150 milion de euro: 94 milon per la njonta IRAP che ie unida tëuta demez, 36 milion per la njonta IRPEF de 0,9% per chiche davania plu de 15.000 euro mpede 1,4% sciche udù dant dal Stato. Leprò ruva mo feter 8 milion de euro per renunzië al IRPEF per n davani sota 15.000 euro, feter 4,7 milion per la reduzion dal chëuta su l auto, 3,4 milion per la renunzia ala njonta sun l strom y 2,3 milion per l scrì ntëur auti.
as
