Atualità
Sinergies per la stredes tla Ladinia
USP - L muvimënt y la segurëza sun la stredes dla Val Badia y de Gherdëina ntan l inviern ie inier domesdì, 27 utober, stat argumënt de n'ancunteda dl assessëur provinziel per la stredes Florian Mussner cun i ambolc y assessëures di chemuns dla Val Badia y de Gherdëina. A Corvara iel unì giaurì na vijion de culaburazion per se nuzé de sinergies.
L servisc per la stredes d'inviern à debujen de formes nueves. „Avëi la stredes nëtes da nëif bele ntan la nuet se damanda n servisc che ne ie nia plu realistich“ à spiegà l assessëur Florian Mussner. Paredlan cun d'autri raions dl'Elpes iel tla provinzia de Bulsan n livel scialdi plu aut n cont de rumé la nëif, y chësc cumporta n gran pëis finanzier y de urganisazion. L'ancunteda a Corvara à giaurì vijions de culaburazion danter aministrazions provinzieles y cumeneles che pudëssa cun la drëta formes nce unì slargëdes a privac. L ne puderà nia unì rumà duta la stredes tl medemo mumënt, n messerà lauré do prioriteies n cont de orars (scola y lëur) y dla funzionalità dla singula stredes.
Debujën de nfurmazion y sensiblisazion iel n cont dl sel sun streda. Respunsabli dl Servisc provinziel dla stredes à sorissà che dut l lëur vën dantaprima fat per la segurëza dla persones sun streda y nsci ie nce debujën de adurvé l sel. La stredes de cumpetënza provinziela tla Val Badia y Gherdëina mesura 165 chilometri, duc sëura i 1000 metri de autëza. Chësta stredes ruva cun de ndut 6 jëufs (Frea, Sela, Ciaulonch, Valparora, Furcia y Börz) nce sëura i 2000 metri de autëza. L mpëni dl Servisc provinziel per la stredes ie de garantì l muvimënt sun streda y dantaldut nce la segurëza dla persones. „Per pité chësc a nosta jënt, fej i lauranc n gran servisc de di y de nuet, se metan nce suvënz nstësc tl pericul“ à dit l assessëur Mussner. I pruvedimënc ntan l inviern, nsci l assessëur, ie per la segurëza dla persones sun streda.
I tecnics dla Provinzia à spiegà che l ne ie nia tan l sel che revina la stredes ma la truepa ega che tira sotite. Deberieda cun l Ufize de Geologia y firmes iel bele unì svilupà materiai nueves. Per l asfalt an svilupà mescedadums y coles nueves. Esperienzes positives an bele fat cun peton che tën plu saurì l dlacé y la bruma. N culaburazion cun universiteies à l Servisc provinziel per la stredes nce purtà inuvazion dlongia streda: l ie unì zidlà plantes che tën l sel. Ejëmpli de chësta plantes ie bele unic sentei danter Toblach y Cortina.
N culaburazion cun i chemuns uelen sensibilisé y nfurmé n cont dl sel sun streda, sëuraprò se an tëut dant de mëter a jì furmazion per i lauranc n cont de avëi la drëta mesura.
L Servisc provinziel per la stredes ie danter Gherdëina y la Val Badia partì te trëi raions: Pruca nchin sun Frea y Sela, dedite da S.Laurënz nchin S.Martin, y da S.Martin nchin sun i jëufs de Börz, Valparora, Ciaulonch y Frea.
Per i 40 chilometri da Pruca nchin sun Frea y Sela lëura na grupa de 8 persones. De 120 dis d'inviern à l Jëuf de Frea unì messù sarà 11 iedesc sun la pert de Sëlva y l Jëuf de Sela 5 iedesc.
Tl raion dedite da S.Laurënz nchin S.Martin iel de ndut 50 chilometri de streda. Na grupa de 8 persones lëura tlo nce per la streda nchin sun Furcia, y ti luesc de Onies, Tobl y Ellen.
L majer raion danter la doi valedes ladines ie da S.Martin nchin pra i jëufs de Valparora, Ciaulonch, Frea y Börz. 8 lauranc lëura sun 78 chilometri de streda per la segurëza dla persones.
L diretëur dl Servisc provinziel per la stredes, Paolo Montagner à prejentà n valguna zifres dl'ultimo inviern: 500 culaburadëures à fat 38.000 ëures ora d'ëura y ie stai de ndut 272.855 ëura a desposizion.
as
