Atualità
Gran orden de merit al Intendant dl BR Gruber
USP - L gran orden de merit dla Provinzia de Bulsan ie ncuei (3 nuvëmber) unì sëurandat dal presidënt Luis Durnwalder al Intendant dl Bayrischer Rundfunk (BR) Thomas Gruber. „Ël ne à nia me cialà che l Südtirol sibe argumënt sun l BR y l ARD, Gruber à nce dat n gran sustëni acioche tla provinzia de Bulsan pudons udëi la televijion tudëscia“ à detlarà Durnwalder.
Tl Südtirol sons na pitla mendranza che ne fossa nia stata bona de se lascé audì a livel nternaziunel zënza tan de sustenidëures. Thomas Gruber ie stat un de chisc y à pudù pië do l gran orden de merit dal presidënt Durnwalder deberieda cun i assessëures Hans Berger, Sabina Kasslatter Mur, Michl Laimer y Roberto Bizzo. Canche la se trata de se lascé audì à i media na posizion zentrela. “Un de nosc partner ie stat y ie daniëura l BR, che à dat tan de usc a nëus sciche pitla mendranza” nsci l presidënt dla provinzia.
Sota Gruber sciche Intendant ie l Südtirol stat na pert segura tla nutizies dl BR y sëuraprò nce dl ARD. “Südtirol à a chësta maniera pudù se fé truep cumpanies nueves” à dit Durnwalder. Ai 5 de setëmber ne à Gruber nia pudù vester ala sëurandata tl Ciastel Tirol.
La uneranza ie esprescion de lecod y rengraziamënt. “Ulon se damandé chi fova pa tlo per nëus canche la ne se jiva nia tan bona, y chi se pa mpenià per nëus” à dit l presidënt sorissan che l valor dl’uneranza ie l simbol de rengraziamënt y amezizia da pert dl Südtirol.
Gruber, dal 1981 pra l Bayrischer Rundfunk, dal 1995 diretëur per l radio, dal 2002 Intendant, à pià do la bedaia cun unëur. “La nutizies sun l Südtirol ie for states tan ubietives sciche l fova mesun, ma daniëura sun la basa de n bënulëi” à dit Gruber, juntan che l ne se ëssa nia pensà che cun si età possen mo avëi na tel legrëza sciche n pitl mut.
as
Galaria dales fotografies
