Atualità
Film: l Südtirol nes stà a cuer
USP – Pra la prejentazion dl film “Südtirol ist eine Herzensangelegenheit”, n vënderdi sëira (19.11.2010) a Dispruch à l assessëur ladin reprejentà la Jonta provinziela de Bulsan. “L ie mpurtant dé inant la storia nce a chësta maniera ajache se rendon cont dl gran valor de toleranza y dl respet” à sorissà Florian Mussner.
L film prejentà dl Metropolkino a Dispruch trata dl destin dl Südtirol tl ultimo centené. Pert zentrela de chësc film te doi pertes ie na documentazion ogetiva y balanzeda dla storia de nosta provinzia. Danter i messages de chësta produzion ie de sensibilisé per cie che ie stat y cie che ie unì fat per purté la Provinzia de Bulsan al livel dal didancuei. “La storia y la cunescënza dla storia ie na fundamënta de svilup” à dit Mussner dan l gran publich cun de plu autoriteies austriaches. La cunescënza dla storia, prejenteda tres n tel film, juda a capì cie che se à fat pea nosc nëinesc y che l’Austria se à sustenì dassënn per arjonjer y mantenì nosta autonomia, nsci l pensier dl assessëur ladin.
Tl film “Südtirol ist eine Herzensangelegenheit” vëniel tratà la tenscions che fova unides su bele dan la prima viera mundiela, la spartizion dl Südtirol dal’Austria y la batalies politiches per arjonjer l’Autonomia. Da udëi iel danterauter toc uriginei de chëi tëmps cun ntervistes de testemonesc te tenscion, tratatives y arjontes. Do che la Rai de Bulsan à d’autonn bele mustrà chësc film iel stat truepa reazions positives.
as
