Atualità
Jonta provinziela: alternatives per sustëni de cuatieres
USP – Do che la suneria de lëur à giudicà l’aplicazion dla lege provinziela n cont de sustëni de cuatieres per extracomuiniteres, sciche azion descirminënta, se à la Jonta provinziela dat ju cun la cuestion. Tla proscima enes chireran alternatives che possa vester l tò demez di cuntribuc, n sistem nuef, na maniera nueva de manejé cuatieres nia liei y mo d’autri pruvedimënc.
Sciche l ie unì rujenà truep ultimamënter, ova la suneria de Bulsan azetà l recurs de n zitadins extracomuniter che ne ova nia giapà aiuc provinziei ajache l capitul a desposizion fova bele finà. La suneria azetea de plën la lege provinziela per chisc cajo, ma ne azeteda nia che per la doi graduatories (zitadins europees y nia europees) vëniel nia adurvà i medemi criteries.
La Jonta provinziela à te si senteda da ncuei (22 nuvëmber) tratà la cuestion y l presidënt l’à pona trat adum tla cunferënza stampa. L giudesc rejona de n dërt sogetif y che l ne va nia bën che la Jonta ova fat na media danter persones extracomuniteres y cumpëida de dumandes.
N cuncret à la Jonta tl ann 2009 metù a desposizion 9,11% di mesuns per cuatieres per zitadins extracomuniteres, che fej ora 14,2 milion de euro sun de ndut 34 milion de euro. “N custimënt de passa 20 milion me per extracomuniteres ne ie nia realistich per la casses provinzieles” à dit Durnwalder. Per abiné an soluzion ala cuestion uniral śën valutà de plu alternatives. N pënsa de tò demez defin i aiuc per cuatieres, svilupé n sistem nuef, cialé sce l IPES pudëssa tò n afit i cuatieres liedesc y i afité inant a chëi che ie tla graduatoria. Ntan la proscima enes uniral valutà chësta alternatives per puëdi pona tò na dezijion.
as
