Atualità
Jonta provinziela sun i cuntribuc per l cuatier
USP – La Jonta provinziela uel fé mudazions ala maniera de paië ora cuntribuc per l fit de cuatieres cun la mira che la jënt da tlo ne vënie nia penaliseda.
Doi sentënzes dla suneria per via de cuntribuc nia paiei ora a zitadins extracomuniteres ie la rejon che i assessëures se à ncuei (29 nuvëmber) inò dat ju cun la maniera de paië ora chisc cuntribuc. Davia che te plu caji calculea l patron dl cuatier bele pea l cuntribut provinziel che i zitadins giapa, ie i priejes nce plu auc. La Jonta provinziela cier do n sistem che ne ebe nia chësta nfluenza indireta sun i priejes dl fit. Un var ie chël che l Istitut per cuatieres soziei IPES tol i cuatieres privac a desposizion n afit y i fita pona inant. Per chësc ne iel nia debujën de fé na mudazion de lege.
I assessëures provinziei à ncuei dat pro de fé trëi mudazions ala lege 13/1998 che regulamentea l paië ora i cuntribuc. La soma mascima vën smendrida da 6.000 a 4.800 euro, che fej ora 400 euro al mëns. Pitla somes sota 50 euro cumporta spëises de aministrazion majeres dl cuntribut nstëss y ne unirà perchël nia plu paiedes ora. La Jonta à nce dat pro de mudé l prinzip che l cuntribut per l fit de n cuatier ne ie nia n dërt persunel, ma na puscibltà che possa unì damandeda.
as
