Atualità
Jonta provinziela: na sëul cunsorz de garanzia per duta la categuries
USP – La Jonta provinziela à ncuei (29 nuvëmber) dat pro de smendrì la cumpëida di cunsorc de garanzia per tò su credic. A chësta maniera possel unì sparanià tl’aministrazion y avëi na majera flessibilità danter una categuria economica y l’autra.
Nchinamò fovel per plu categuries economiches de plu cunsorc de garanzia che zapa ite sce vel firma ne ie nia plu bona de paië ju i scioldi mprestei. Do feter n ann de descuscion danter aministrazion y reprejentanc economics à i assessëures provinziei ncuei tëut la dezijion de fé me plu n sëul cunsorz, ma che lëura a doi livei. La majera pert dl’atività reverda mprësć de mëndra somes caji de chësta mesura unirà tratei da una cumiscion, ntant che la majera somes unirà tratedes da n’autra cumiscion. “A chësta maniera ons me plu un cunsorz de garanzia cun doi repartizions mpede sies cunsorc cun sies aministrazions” à detlarà l presidënt Durnwalder te cunferënza stampa do la senteda dla Jonta. La Provinzia à nchiamò sustenì i cunsorc de garanzia cun de gran somes, perchël iel nce drët, nsci Durnwalder, che chisc scioldi dla chëutes vënie adurvei a na maniera plu flessibla danter la categuries economiches.as
