Atualità
Jonta provinziela à azetà de fé n puent nuef sun Jëuf de Sela
USP - Sun l Jëuf de Sela, riesc sota la cava uniral fat n puent nuef. La Jonta provinziela à te si senteda de chëst’ena azetà la pruposta dl assessëur Mussner de fé l puent da nuef per garantì la segurëza y l culegamënt.
Aldò de analises di puenc sun la stredes provinzieles à chël al chilometer 26,8 dla streda dl jëuf de Sela giapà gran priorità per l fé da nuef. “Te chëla che te Jonta provinziela ons dat pro dé fé chësc puent da nuef, possen śën jì inant cun la preparazion tecnica” spiega l assessëur ala stredes Florian Mussner. L puent n cuestion ie drët daujin a n auter puent dla medema mesura che n ie bele tl lëur de fé.
L puent nuef dëssa avëi na lunghëza de 10,8 metri. La streda che passa sëuravia unirà fata 6 metri lergia cun leprò mo n ëur de mez meter per pert. Danter lëures y custimënt tecnich iel udù dant n nvestimënt de 397.000 euro.
Acioche l muvimënt de streda posse nce passé ntan i lëures uniral fat n puent provisor de fier. “Davia che l puent ie tan ndeblì ne possen nianca frabiché da nuef lascian furné l muvimënt sun mesa larghëza de streda, nsci messons fé l puent provisor, sce ulon lascé passé auti, camions y curieres ntan i lëures” spiega l assessëur Florian Mussner. La proietazion dl puent, direzion di lëures y mesurazions tecniches vën fates nstës dal Assessorat ai Lëures publics.
De fauré de chësc ann fovel unì fat n collaudo y n à cunstatà che la strutura che tën sul puent, cun i trames de peton, ie unida ndeblida mo deplù dal’eghes y sel dl inviern. I resultac dl’analisa de chësta situazion atuela lascia pro che l posse for mo passé mesuns nchin a 33 tones.
as
