Atualità
Jonta provinziela: 40 milion per i chemuns de sëida y proiec de culaburazion
USP – La provinzies de Belun y Sondrio à gran nteres ai 40 milion de euro che la Provinzia de Bulsan à tres l’acurdanza de Milan udù dant per proiec che reverda chemuns ujins. Te si senteda de (ncuei) luesc, 20 de dezëmber à la Jonta provinziela de Bulsan spezificà che chisc scioldi dëssa me unì adruvei per i chemuns che va a sëida.
L’acurdanza de Milan vëija dant che la Provinzia de Bulsan sëurantole proiec tl cuntest de duvieres statei per n custimënt de 100 milion de euro al ann. De chësta soma ie 40 milion udui dant per proiec de culaburazion y culegamënt cun chemuns dl’autra provinzies che va a sëida cun la provinzia de Bulsan. Cuncretamënter se tratel de 5 chemuns belunesc y doi tl Sondrio. L’autra provinzies ulëssa che i 40 milion unisse metui deberieda cun chëi de Trënt te n fond y che de chisc scioldi pudëssa nce se nuzé chemuns ujins de chëi che va a sëida cun la region Trentin-Südtriol.
Tla cunferënza stampa riesc do la senteda dla Jonta provinziela à l presidënt Durnwalder detlarà che a Bulsan ne puderan nia azeté la pruposta dl’autra provinzies. “On udù dant chisc scioldi per avëi na sëida culturela y de nfrastrutures plu mujela de viers de nosc chemuns ujins, ma nia per finanzië nteresc dl’autra provinzies” à dit Durnwalder, “Sëuraprò a Trënt scialdi de plu chmuns ujins y perchël se spartissa i scioldi de Bulsan nce sun chëi, cossa che ne ulon nia ajache la se trata de nosc raions de sëida”.
La Jonta provinziela de Bulsan ie a una per proiec sëuracumenei y chël uel di scumenciadives che toca nce l raion dla provinzia de Bulsan. Durnwalder à dan a giornalisć fat referimënt al raport y culegamënt danter Fedom y Corvara ulache l ie sculeies de Rèba y Fedom che vën menei a scola a Corvara. Nscila pudëssel unì fat strutures a Corvara che va nce a bën di ujins de sëuramont. Danter i ejëmpli dl presidënt dla provinzia iel nce unì tucà l mantenimënt y l rumé dla nëif sun la stredes (Ciaulonch) y l trasport de prim aiut. I 40 milion pudëssa, aldò de Durnwalder nce unic tëuc ca per nvië via na miëura culaburazion cun Cortina, fajan nvestimënc per l spedel de San Ciana/Innichen, nuzà nce dala jënt de Cortina, l purtoi da podejé y streda dala rodes danter Toblach y Cortina o l zënter culturel “Grand Hotel” de Toblach.
Co che dëssa unì adurvei i 40 milion, ann per ann, dëssa nce traté na cumiscion interprovinziela. “L fossa miec sce la sënta de chësta cumiscion unissa metuda a Cortina y no a Verona” à dit Durnwalder. N cont de proiec culturei à l presidënt dla provinzia dit che per proiec de cultura ladina pudëssel nce unì tëut n cunsciderazion chemuns ujins cun i chemuns che va a sëida cun la provinzia de Bulsan.
Per merdi, 21 de dezëmber ie udù dant na senteda a Roma cun l minister Roberto Calderoli per stlarì co y te ce maniera che possa unì adurvei i 40 milion de euro udui dant dal’acurdanza de Milan.
as
