Atualità
Degun cuntinghënt de lauranc nia comuniteres
USP – Sëuraprò ai lauranc de sajon nia europees ne damanderà la Provinzia de Bulsan degun lauranc per l cuntinghënt de dut l ann da ora dl’Europa. La Jonta provinziela à te si senteda dl (ncuei) 20 dezëmber ulù fé chësc var per dé n sustëni ala jënt da tlo che ne à degun lëur.
La Provinzia de Bulsan possa ann per ann damandé al guviern de Roma la lizënza per n cuntinghënt de lauranc nia europees. Per lëures de sajon tl turism y agricultura fovel bel unì damandà lizënza per 800 lauranc. Per lëures ntan dut l ann ne iel unì damandà nianca na lizënza. “Tla provinzia ons danter 8.000 y 10.000 zënza lëur, l’economia dëssa n iede dé da lëur a nosta jënt, nce sce i costa n fruz de plu” à dit Durnwalder tla cunferënza stampa do la senteda dla jonta.
as
