Atualità
Trëi proiec piloc de sanità
USP – La Jonta provinziela à te si senteda de (ncuei) 20 de dezëmber dat pro trëi proiec de prova a sustëni de jëuni, jënt de tëmp y persones che à debujën de cures.
Jëuni y pitli cun dificulteies che à debujën de cures y cumpaniamënt generel dëssa pudëi viver a cësa, te si ambient naturel. Do chësta vijion à i assessëures provinziei dat pro n proiet pilot de cures psicologiches y psichiatriches udan dant che i jëuni o pitli ne muessa nia viver ora de cësa. La mira de chësc proiet ie na ntegrazion tla familia, scola y vita soziela te puech tëmp.
Nce per l servisc paliatif uelen purvé n proiet che lascia pro che la persones n pont de mort posse sté a cësa. “Tla valutazions naziuneles son tl’ultima posizion ajache ne on nia drë liec per chësta persones” à dit Drunwalder te cunferënza stampa. L proiet vëija dant che dutores y chëi de familia se feje ora deberieda n program de cures y coordineie l servisc. “Ala familia a cësa ti vëniel dat la garanzia che te uni mumënt possi se damandé n aiut y n sustëni. “Chësc ne fajons nia me ajache l costa de manco, ma dantaprima ajache l ie na forma de cura plu umana” nsci Durnwalder do la senteda dla Jonta provinziela.
L terzo proiet reverda l servisc de cura via per l di. L ie caji ulache la persones ie massa bones per les mëter te spedel y massa stletes per resté dassëules a cësa. L proiet dëssa da una pert tò ju lëur ala strutures, dé la puscibltà de cures a cësa y garantì na bona coordinazion dl servisc. N pratica se tratel de servijes ambulanc per pazienc n tan l di, a na maniera che i possa giapé n servisc efizient y che i possa l medemo di inò jì a cësa.
as
