Atualità
Tëut cumià dal diretëur Helmuth Moroder
USP – Cun la fin dl ann lascia Helmuth Moroder, diretëur tecnich dla strutures de trasport (STA) y diretëur dla ferata dla Val Venuesta, si atività per se dediché a d’autri mpënies prufesciunei. Pra na pitla festa de cumià à l assessëur provinziel ala mubilità Thomas Widmann unerà l mpëni de Helmuth Moroder de Urtijëi per na mubilità tl respet dl ambient.
“Sce ti ani passei iel stat mesun realisé dastramp n gran program te n tëmp da record, ie chësc defin nce per merit dl lëur da uni di, l mpëni de cuer y de cunvinzion per mudernisé la ferata locala” à dit l assessëur Widmann pra la festa de cumià. Te puech tëmp ie la STA cun Moroder danora, stata bona de mëter a jì la ferata dla Val Venuesta y pona do che la ie mueta dl 2005, de la fé cunëscer sëura la sëides provinzieles.
Sota la direzion dla STA iel sëuraprò unì mudernisà na gran cumpëida de stazions dla ferata cun si raion ntëurvia. Nce la ferata de Puster ie unida muderniseda te n tëmp da record de nia cis trëi ani. Widmann à unerà Moroder per si savëi tecnich, si cunseguënza tla proietazion y realisazion de gran lëures y nia per ultimo per si maniera de traté culaburadëures, aministradëures y partner de lëur. “Tl tëmp de Moroder à l muvimënt dla ferata tl Südtirol giapà valuta y la ferata ie deventeda fundamënta dl trasport publich” à dit Widmann.
Dan undesc ani, canche l fova unì scumencià a mëter a jì la ferata dla Val Venuesta, ova Helmuth da Scurcià sëurantëut la direzion tecnica dla STA che ie ntant deventeda na sozietà inhouse dl dipartimënt provinziel de mubilità. “chësc ie nasciù dala mutivazion de mëter a jì velch de utl per la cumenanza n cont de trasport publich” à dit Moroder.
Tl ann nuef sëurantol Joachim Dejaco, che fova nchinamo diretëur aministratif, la direzion generela dla STA. La ncëria da diretëur dla ferata dla Val Venuesta sëurantol Giancarlo Bonani, che ie stat per truep ani dirijënt dla sozietà taliana per la scines RFI. Ti ultimi ani ova Bonani laurà deberieda cun la STA sciche prim ingenieur dla mudernisazion dla ferata de Puster.
as
