Atualità
Cunzescion dla zentrela de S.Flurian ala SEL
USP – La Jonta provinziela ti à sëurandat ala SEL la cunzescion dal’ega per la zentrela dal strom S.Flurian tl chemun de Neumarkt, una dla majera de duta la region. Chësc ie unì fat al savëi dal presidënt Durnwalder ntan la cunferënza stampa do la senteda dl 30 de dezëmber (ncuei).
Tla zentrela de S. Flurian vëniel fat na produzion de 500 milion de kw/h de strom al ann. Nce sce l ie sun puscion dla Provinzia de Bulsan, vën l’ega dal chemun trentin de Castello-Molina di Fiemme. La cunzescion che toma cun l prim de jené 2001 ie unida sëurandata ala SEL che ie unida crissa ora mpede l’ENEL. “I bënsteies fova per la pruposta dla SEL che vëija dant nvestimënc per l ambient de 59 milion te 30 ani” nsci ne pudans nianca tò n’autra dezijion” à dit Durnwalder. De chësta minonga fova danteruater nce la cumiscion per l dann ambientel y 14 de 19 chemuns ujins (Cembra, Salorno, Anterivo, Anterivo, Segonzano, Lisignago, Faver, Grauno, Sover, Giovo, Egna, Trento, Castello-Molina di Fiemme).
Dan doi mënsc ova i presidënc dla provinzies de Trënt y Bulsan, Lorenzo Dellai y Luis Durnwalder sotscrì n’acurdanza propi per la zentrela de S.Flurian. L fova unì fat ora che la cunzescion de trëi ani per la zentrela unissa sëurandata da Bulsan y che chëla per l’eghes de Stramentizzo unissa data da Trënt.
as
