Atualità
Cumiscion per la gestion dl muvimënt sun streda
USP – Te si prima senteda dl ann nuef à la Jonta provinziela (ncuei) ai 10 de jené fat ora de mëter su na cumiscion per la coordinazion y nfurmazion dl muvimënt turistich sun streda. A chësta maniera uelen ti jì permez al fenomenn dla stredes mpifedes ntan la sajon auta.
L muvimënt sun la stredes dla Provinzia de Bulsan ie ntan la festes stat majer de zënza. “Sce sun l autostreda iel stat debujën de lascé ite i auti te cuntinghënc, n puech al iede, pona iel sëni che zeche ne va nia bën” à dit l presidënt Durnwalder tla cunferënza stampa do la senteda dla Jonta. Problems cun la stredes mpifedes iel dataprima stat te Puster. I assessëures provinziei à dat pro de mëter su na cumiscion che dëssa abiné soluzions al gran muvimënt y purté dant prupostes acioche l barat de turisć danter chëi che ruva adalerch y se n va, ne sibe nia dut te un iede.
Reprejentanc dl Assessorat provinziel ala mubilità, dl’autostreda, dl ciamp turistich, di chemuns tuchei y dl Cumissariat dl Guviern dëssa tla cumiscion nce lauré ora pruvedimënc per miuré la nfurmazion che arjonj nce la categuries spezifiches sciche per ejëmpl l’agenzies turistiches. Da pont de ududa turistich, nsci l presidënt dla Provinzia, dëssa l viac de ruvé adalerch y l se n jì a cësa vester zënza desplajëies. Ntan l ultimo di de feries ne dëssa i tlienc nia messù aspité ëures sun stredes mpifedes.
as
