Atualità
Mussner y l minister Paasch sun formes nueves per finanzië strutures publiches
USP – Ntan si vijita tla provinzia de Bulsan, à l minister belga Oliver Paasch, l’ena passeda deberieda cun l assessëur Mussner analisà pusciblteies nueves per finanzië strutures publiches. L assessëur provinziel a bele nvià via de plu vares per abiné formes inuvatives de finanzië frabiches te tëmps ulache l’aministrazion publica à manco mesuns a desposizion.
Formes nueves de frabiché strutures de furmazion y servijes nteressa Florian Mussner, sciche assessëur ai lëures publics, te na maniera particulera ajache nce tlo da nëus uelen lauré cun formes nueves de finanziamënt. Mussner à bele fat prim vares per tré ite ressorses nueves a frabiché strutures publiches. Chisc dis iel a Bulsan unì tenì n seminar cun esperc dl'Università Bocconi de Milan n cont de pusciblteies de finanziamënt inuvatives per strutures publiches. De chësc vieres à l assessëur ai lëures publics nce bele metù a jì ancuntedes cun l parlamenter Herbert Dorfmann per analisé la pusciblteies a livel europeich.
Mparan a cunëscer miec l’esperienzes n cont de finanziamënt alternatif dla „Deutsche Gemeinschaft“ tl Belgio à l assessëur Mussner y l minister per la scola, furmazion y ocupazion Oliver Paasch abù n bon barat de ideies. La furmazion ie la miëur nvestizion per l daunì: de chësc ie Paasch y Mussner stai defin a una. Sëuraprò ala mpurtanza dla furmazion cun la funzion zentrela di nsenianc, à i doi aministradëures nce tratà aspec che reverda strutures adatedes per n nseniamënt inuvatif che tën cont dl daunì. Tl'ancunteda dl minister Paasch cun Mussner iel uni rujenà dl bujën de pusciblteies nueves per finanzië strutures de scola te tëmps de manco mesuns publics. Paasch à prejentà l prim cuntrat de culaburazion privata-publica (Pubblic-Privat-Partnership) che l guviern belga à sotscrì da permò. Te chësc cajo cuncret se tratela de na cooperazion danter aministrazion publica y n cunsorz de firmes privates che se à tëut su l mpëni de fé nvestimënc te strutures de scola inuvatives, ecologiches y che dura tl daunì.
„Chëst ancunteda fova na tapa mpurtanta te nosc mpëni de abiné te chisc tëmps de manco mesuns publics, nce tlo da nëus formes de finanziamënt inuvatives per la strutures tl ciamp dla furmazion“ à dit l assessëur Mussner.
L cuntat cun l minister Oliver Paasch ova Mussner bele abù de lugio dl ann passà canche l fova stat a Eupen tl Belgio sun nvit dl Presidënt di ministri Karl-Heinz-Lambertz. „Teniron inant i cuntac cun la cumunità tudëscia tl Belgio y susteniron n bon barat de esperienzes“ à dit Mussner do l'ancunteda.
as
