Atualità
Provinzia barata Casermes sun puscions dl Stat
USP – La Jonta provinziela de Bulsan à te si senteda (da ncuei) dl 17 de jené dat pro n barat cun l Stat per giapé puscions. Sciche bele tl cajo dl militer, vëniel nce cun la forzes de polizai cumedà y fat su casermes (una nce a Badia) per giapé dal Stat puscions te de bona lueges.
L barat cun l Stat che i assessëures provinziei à dat pro, vëija dant che la Provinzia de Bulsan cumedé su y feje n pert da nuef sies strutures. Aldò de ndicazions dl Minister dl Ntern, se tratela dantaprima de casermes di Carabinieri, che ie a Sterzing, Neumarkt, Jenesien, Badia, Persenon y Tluses. Da pert dl Stat iesen stentei a paië l fit. Aldò de tratatives cun nce l Cumissariat dl Guviern iesen ruvei a una che la Provinzia, cumedé su o compre chësta stazions per les mëter a desposizion de Carabinieri y Polizia. La caserma de Badia che ie śën de puscion dl Chemun, ie danter chëles che dëssa unì cumpredes ju dala Provinzia per ti la dé al Stat.
Sun l lëur y custimënt dla Provinzia dà l Stat diesc raions che ne vën nia plu adurvei per rejons de polizai, ma che ie te bona posizions y che à n gran valor pont de ududa de raion. Aldò dl barat deventerà la Provinzia patrona dla vedla perjon a Persenon, dla cëses Vila Caldera, Vila Piave y Vila Italia a Maran, la vedla caserma dla Guardia di Finanza cun i cuatieres di ufezieres a Graun tla Val Venuesta, la vedla dogana sun l Prëner y na pert dla caserma Ruazzi a Elvas sëura Persenon. Sciche alternativa puderal nce unì tëut n cunsciderazion l vedl raion per julieres a Palmoschoß.
Sibe i lëures che dëssa fé la Provinzia, che nce la puscions dl Stat dëssa n iede unì sciazedes per avëi na basa da calculé n barat valif. “Sota la rissa ne daussa la Provinzia te chësc barat nia paië lessù” à detlarà l presidënt Durnwalder tla cunferënza stampa do la senteda dla Jonta.
as
