Atualità
Dezijion definitiva spënta per la lege sun l’imigrazion
USP – N generel ie la Jonta provinziela stat a una cun la pruposta de lege sun l’imigrazion che fova unida adateda do la senteda dl’ena passeda. Dlongia la rejons per zitadins nia europes, dëssel nce unì udù dant miec i duvieres, perchël ie la dezijion definitiva sun chësc dësseni de lege unida spënta ala proscima senteda.
N cumité de assessëures dëssa lauré ora i ultimi particuleres dla lege sun l’imigrazion per la provinzia de Bulsan. Te truep caji iel la lege naziunela che dà dant cundizions per i zitadins che vën da ora dl’Europa. Da pert dla Provinzia de Bulsan uelen udëi dant cundizions di zitadins da oradecà canche la se trata de aiuc y suvenzions provinzieles. “Zitadins nia europees ne ie nia me bënunì, ëi muessa nce lauré tlo da nëus y respeté nosta rujeneda, cultura y religion” à dit l presidënt Durnwalder tla cunferënza stampa do la senteda dla Jonta. Cun la lege provinziela nueva uelen no me udëi dant la rejons di imigrei, ma nce i duvieres. Nascì messerà imigrei mustré su che i vif da amaca cin ani tla provinzia y che de chisc ai laurà amanca trëi ani per giapé suvenzions provinzieles. Per jì tlo a scola muessa i zitadins da oradecà savëi la rujeneda, cossa che vën nce damandeda dai granc a na maniera da arjonjer plu saurì la ntegrazion.as
