Atualità
Jonta provinziela a una sun la lege de imigrazion
USP – La pruposta lege de imigrazion ie do doi spëntes, (ncuei) ai 24 de jené passeda tla Jonta provinziela. “On abinà na bona streda danter dërc y duvieres di zitadins che vën da oradecà” à cunedì l presidënt Durnwalder”. A duc ti vëniel garantì i servijes de basa y l dërt de studië. L vën damandà cin ani de residënza per cuntribuc tl ciamp soziel, cunscidrei nia de basa. Per aiuc n cont de n cuatier vëniel damandà cin ani de residënza y de chisc trëi ani de lëur.
Aldò dla cumpëides Astat che ie unides fates tl 2009, iel tla Provinzia de Bulsan 26.500 zitadins nia europees. Chësta persones ie prinzipalmënter tuchedes dala pruposta de lege sun la ntegrazion de zitadins da oradecà tl Südtirol, che ie unì dat pro dala Jonta provinziela. Cun i pruvedimënc nueves se an tëut dant de purté na regulamentazion danter dërc y duvieres di zitadins fulestieres. “Rati propi che l ie na bona lege y n bon cumpromis – nscì Durnwalder – ajache chiche lëura tlo da nëus dëssa nce avëi l dërt de unì tratà aldò. L ie debujën de respet da tramedoi pertes, respet per la persona, cultura y religion”.
Per sustenì la ntegrazion soziela sënten sun la cunescënza sibe dla rujenedes che nce dla storia y cultura dl post, se nuzan de pruvedimënc sëuraprò permez a chëi che ie bele a livel naziunel. Tla scola vëniel dat pëis ai cursc di zëntri de rujeneda udan dant che chëi che ne sa nia la rujeneda muessa fé pea chisc cursc. A livel provinziel uniral nce nvià via n program de mediatëures interculturei che à l duvier de miuré i cuntac danter zitadins fulestieres y la cumenanza dl post y la istituzions.
N cont de lëur y dla furmazion prufesciunela, nscì l assessëur Bizzo, juderan chëi che à n titul de studi y ie tlo per n tëmp de pratica o tueda, a resté tla provinzia. La lege vëija dant che duc i zitadins fulestieres giape la prestazions sozio-saniteres cunscidredes de basa. Per giapé cuntribuc muessen viver tlo da 5 ani. L sustëni per l cuatier ne vën nia mudà permez ala lege dl 1998 che se damanda 5 ani de residënza y trëi de lëur. Da nuef iel che l unirà judà a abiné soluzions da viver sciche per ejëmpl cuatieres cunvenzionei sce n à n cuntrat de lëur. L unirà nce sustenì sperimentazions da pert di chemuns, patrons de lëur y urganisazions de sindacac.
L Servisc de coordinazion dl imigrazion, che fej pert dla repartizion dl lëur, se cruzierà de coordiné i pruvedimënc per l’inegrazion se stizan sun i chemuns y la cumuniteies de raion che dëssa numiné na persona de referimënt sun l post. Na cunsulta provinziela aposta dëssa purté dant prupostes y fé cunsciderazions. L zënter contra la discriminazion dëssa cialé do la situazion y dé assistënza.
I prinzipies y obietives dla lege unirà cuncretisei te programs per plu ani che udrà dant ativiteies y prioriteies per la ntegrazion de zitadins da oradecà. Chisc programs muessa unì dai pro dala Jonta provinziela sun cunsëi dla Cunsulta per l’imigrazion.
as
