Atualità
Scemplificà l scrì ora de lëures publics
USP – La Jonta provinziela de Bulsan à dat pro na scemplificazion dl scrì ora lëures publics. Sun pruposta dl assessëur Florian Mussner se tratel de pruvedimënc per ti unì ancontra ala firmes de mesura mesana y ala pitla mprejes da tlo. La nuviteies reverda ncëries nchin a 500.000 euro.
La normes dl scrì ora lëures publics ie dantaprima tachedes ala soma dl custimënt. Tl assessorat provinziel ai lëures publics se an tëut dant de auzé la sëida de 500.000 euro a na milion. La pusciblteies vën analisedes, tenian nce cuntac a livel europeich per abiné na soluzion. Te chësc mumënt ne possen mo nia fé cont cun na lege nueva y nsci à i assessëures provinziei (ncuei) ai 24 de jené dat pro na scemplificazion per scrì ora lëures nchin a na soma de 500.000 euro.
Te caji speziei toma demez la pruzedura de cuntrol dla firma che pieta priejes scialdi plu basc permez a tant che fova udù danora tl proiet. “Per lëures de n custimënt nia tan grant muessa la firma che à fat la pruposta de n priesc bën nstëssa garantì che la ie bona de fé l lëur” à spiegà l presidënt Durnwalder te cunferënza stampa do la senteda dla Jonta.
I assessëures provinziei à nce dat pro de unì ancontra ala firmes n cont dla cauzion che les messova paië per garantì n bon lëur. Aldò de chësta dezijion ne iel nia plu debujën de cauzions danora per lëures nchin a 200.000 euro. Per lëures nchin a 40.000 euro y per servijes nchin a 20.000 euro toma la cauzion demez defin. Plu scëmpl sarà nce l cont per scudì de mëndri lëures publics y l paië ora de n acont.
as
