Atualità
Censimënt: forma de detlarazion dla grupa de rujeneda a bën di Ladins
USP – Pra l cënsimënt dla populazion dla provinzia de Bulsan, de utober 2011 uniral adurvà na regulamentazion nueva per la detlarazion dla grupa de rujeneda. La Jonta provinziela à te si senteda (da ncuei) dl 31 de jené dat pro che per la detlarazion a fin de statistica dëssel me unì tëut n cunsciderazion i zitadins de naziunalità taliana che à l di de referimënt la residënza tla provinzia. A chësta maniera giapa i ladins, sciche mëndra grupa de rujeneda, n majer pëis.
“La dezijion dla Jonta provinziela n cont dla forma de detlarazion etnica ie n gran var politich y dassënn positif per la grupa de rujeneda ladina” à dit l assessëur provinziel ladin. L garantësc de no pierder de perzentuela permez ai zitadins che vën da oradecà.
Pra l ultimo cënsimënt messova i zitadins dé ju doi detlarazions per la grupa de rujeneda, una anonima y una nia anonima. Coche l presidënt dla provinzia Durnwalder à spiegà tla cunferënza stampa riesc do la senteda dla Jonta uniral pra l cënsimënt de utober 2011 me plu damandà la detlarazion anonima a fin de statistica. La detlarazion persunela, (da fé diretamënter pra la suneria de Bulsan) muessa me plu fé chi che l’adrova. Chësta detlarazion che vën tëuta n cunsciderazion per giapé na stiera possa unì mudeda, ma cun fazion de 18 mënsc plu tert.
La detlarazion anonima per fins de statistica ie la basa per museré la grandëza dla grupes de rujeneda. I assessëures provinziei ie stai a una che chësta detlarazion possa me fé i zitadins taliani che à l di dl cënsimënt (ai 9 de utober) la residënza tla provinzia. “Sce n ëssa tëut n cunsciderazion duc i zitadins europeics che on te provinzia fossa la grandëza dla grupa de rujeneda ladina caleda de feter 2%, perchël ons ulù fé nsci che la grupa tudëscia, sciche majera grupa pierderà n fruze, y i ladins, sciche mëndra grupa se mantenirà plu o manco”. Chësta dezijion ie de ntres dl assessëur ladin Florian Mussner che vëij tl cënsimënt n mumënt mpurtant y strategich per la grupa de rujeneda ladina. “L ie l mumënt de pensé al daunì y co che nëus ladins pudon mantenì nosta posizion zënza pierder de perzentuela” à dit l assessëur Mussner pensan a na forma nueva per garantì la stieres ai ladins. “Sce l vën for mo jënt da oradecà, ne sarà i ladins nia boni de mantenì si perzentuela. Perchël fossel bon arjonjer n cuntinghënt de stieres che ne vën garantì danora” nscì l’idea de Mussner.
Tla provinzia iel aldò dl presidënt dla provinzia feter 7.500 zitadins de naziunalità tudëscia y austriaca, chisc se detlarëssa bonamënter per la grupa tudëscia. “L cënsimënt che tën cont di zitadins taliani cun residënza ie dessegur la forma plu drëta y senziera” à detlarà Durnwalder.
as
