Atualità
Scola ladina: materies de matura 2011
USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. Tla trëi sezions defrëntes se tratela de economia aziendela, rujenedes fulestieres y dessëni. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.
L diretëur de repartizion Alexander Prinoth spiega che la materies per la segonda prova scrita da chëst ann tla scoles de Gherdëina y Badia ie seguredes.
Ti Istituc per l cumerz a Urtijëi y La Ila uniral tl sezion per l cumerz IGEA damandà la materia de economia aziendela tla prova scrita. Cumëmbri dla cumiscion da oradecà puderà damandé i sculeies do la rujenedes tudësch, talian y geografia economica.
Tla sezion turistica y de rujeneda dla scola auta Raetia a Urtijëi messerà i candidac ënghe dé ju na prova scrita de rujeneda fulestiera. Nsenianc da d’autra scoles puderà damandé ora la materies tudësch, talian y geografia economica - turistica.
Tla Scola d’ert a Urtijëi vel l dessëni per la segonda prova scrita. La materies talian y tudësch, conc y fisica unirà damandedes da cumiscioneres da d’autra scoles.
Tl Lizeum linguistich a la Ila reverda la segonda prova scrita la rujeneda fulestiera. Cumisseres d’autra scoles puderà damandé tla materies talian, tudësch y scienzes natureles.
Tla scoles autes paritetiches ladines possa i candidac tla prima prova scrita crì ora danter tudësch y talian. La terza prova scrita ie metuda adum da doi pertes: n iede vëniel damandà cunescënzes te chëla rujeneda che ne ie nia unida crissa ora per l prim di. Tla segonda pert muessa i maduranc respuender a na prova multidisziplinera che reverda de plu materies.
Da nuef permez al ann passà ie che i privatisć messerà de jù n ejam de amiscion y a chësta maniera devënta l ejam plu mpeniatif. L sistem nstess de matura resta unfat.
as
