Atualità
Nrescida ASTAT sul livel de vita: mëndra families – mantenì l davani
USP – Ntan i ultimi cin ani ie tla provinzia de Bulsan smendrida la grandëza dla families. La mesaria de davani de familia ie resteda feter unfat. Tla prejentazion stata (ncuei) ai 03 de fauré a Bulsan à l presidënt dla Provinzia Durnwalder valutà i resultac dl studi sciche na resposta positiva ai pruvedimënc contra la crisa finanziera y sciche cheder dla situazion atuela dla families.
La nrescida sun l davani, avëi y la cundizions de vita dla families tla Provinzia de Bulsan ie unida fata ti ani 2008-09. I resultac che n à śën finà da lauré ora possa unì paredlei ala nrescides dan cinch y dan diesc ani. Per l’aministrazion provinziela ie i ultimi resultac particularmënter nteressanc per udëi la cunseguënzes dla crista. “L cheder dla situazion economica dla families mostra su che l livel mesan ie mo for drët bon” à dit Luis Durnwalder. L’analisa dl Istitut provinziel de statistica ASTAT mostra nce su sce la families ciafieia cun si situazion economica y co che ie la tendënzes per l daunì.
La cumpëida dla families ie ti ultimi diesc ani aumenteda da 167.112 a 200.667 che fej ora +20%. La grandëza dla families ie smëndrida a na mesaria de 2,5 persones permez a 2,7 che fova mo dl 1997. La majera mudazion reverda la persones che vif dassëules che ie aumentedes de 42% ruvan tl 2008 a na cumpëida de 68.984. Sun duta la families iel 58,1% caji cun me una o doi persones.
Nia cis na terza pert de duta la families (32,1%) ie pere y oma cun mutons.
La families ova a desposizion de ndut 6,7 milion de euro de davani. 186,8 fova scioldi de cuntribuc publics per families sozialmënter dëibles. 51.175 families à pià do chisc cuntribuc. N mesaria ova la families 33.433 euro a desposizion sce n cumpëida davani y cuntribuc publics. Chësc fossa 11% de plu permez a cin ani dant, ma tenian cont dla nflazion ie l davani mesan realmënter calà de un percënt. L davani mesan per persona fova dl 2008 de 15.381 euro. Danter zità y valedes iel feter deguna defrënza.
Tl ciamp soziel vëniel da pert dla Provinzia de Bulsan spendù ite gran somes y chësc cumporta nce a arjonjer chisc bon valores n cont de davani mesan. “Per caji ulache n se la cava nia da sëui vëniel per ejëmpl spendù ite 190 milion de euro y la Provinzia de Bulsan ie la sëula te duta la Talia che garantësc l minim de vita” à sorissà l assessëur Richard Theiner.
Feter trëi cherc dla families à respundù ala nrescida che si situazion finanziera ne ie tant che nia mudeda permez al ann dant. Manco che n chert à dit che la ti va plu stleta. Tlo iel da tenì cont che la nrescida ie unida fata tl 2009, propi amesa la crisa economica y nsci ie chësc resultat unì valutà positivamënter.
Ala dumanda sce la families ciafieia cun si davani à n chert di de se la cavé zënza problems. Zitadins che vën da oradecà à dat sëura che i se fej dassënn ert.
62,7% dla families dla provinzia de Bulsan à nstess n cuatier. Chësc ie de plu che te autri raions. Paredlan la grupes de rujeneda che ne à degun cuatier nstëss iel 45,3% di taliani, 31,6% di tudësc y me 28,45 di ladins.
N’autra nrescida che ie unida analiseda per grupa de rujeneda reverda l davani. La 11.678 families ladines à n davani mesan de 35.969 euro permez a 33.501 euro dla tudësces y 28.812 dla talianes.
Ala nrescida dl ASTAT à respendù 1.100 families. Per la grupa de rujeneda ladina iel unì damandà ora na majera cumpëida permez a si perzentuela, chësc a na maniera da giapé n resultat plu realistich.
as
