Atualità

Scora / Cultura | 08.02.2011 | 09:47

En jöbia, ai 10 de forà: sëra de informaziun sön les scores altes da La Ila

USP – Da d’altonn gnaràl indô pité trëi scores altes a La Ila. Les novitês, les mudaziuns y dötes les informaziuns de ütl por chirì fora öna dles scores vëgn presentades en jöbia, ai 10 de forà tratan na sëra de informaziun tla scora alta da La Ila. I geniturs y düc' i interessà é invià dales ot da sëra.

Ai scolars dla Val Badia che é tl laûr de rové la scora mesana ti vëgnel pité trëi scores altes a La Ila: ai interessà de economia ti vëgnel pité l’istitut tecnich economich cun na formaziun sön l’aministraziun, les finanzes y le marketing. Ai scolars che é interessà ai lingac ti vëgnel pité da fà le lizeum linguistich. I jogn y les jones che se sënt plü portà por le ćiamp dla formaziun y dl sozial à la poscibilité de se scrì ite al lizeum dles sciënzes umanes.

Cun la reforma dles scores altes àn te n pröm momënt miné de messëi ascortè la cerna de scores altes tla Val Badia porvia dl numer de iscriziuns. “Al me fej gran plajëi che i sun impò stà bugn da fà a na moda che les families pois śëgn chirì fora danter trëi scores altes” sotrissëia l’assessur provinzial Florian Mussner.

La sëra de informaziun da en jöbia, ai 10 de forà é dantadöt ponsada por i geniturs di scolars dles secundes y terzes tlasses dles scores mesanes dla Val Badia. Al gnarà presentè les trëi scores altes y les novitês por l’altonn. Tl istitut tecnich gnaràl pité de plü ores de informatica co ti agn passà. Tl lizeum linguistich pon en cunt di lingac foresć chirì fora danter le franzesc, le spagnol o le rus. “Te chësc lizeum gnaràl dediché tröpes ores ai lingac foresć, por ejëmpl por ći che reverda le franzesc s’unse tut dant de arjunje le livel B1 y B2, che é n livel dër alt” spliga le diretur Albert Videsott.

I scolars che se stënta da chirì fora na scora alta, ciafa tres la reforma la sauridanza de podëi mudé plü saurì da öna na scora al’atra. Les prömes döes tlasses se desfarënzia ma püch da öna na scora al’atra, y a chësta moda pol, dantadöt dô i pröms dui agn, gnì mudé saurì scora.

Danü él inće che tles scores altes dles valades ladines gnaràl por le pröm iade, tignì indlunch döes ores de ladin al’edema.

Les iscriziuns ales scores altes vëgn tutes sö ćina al plü tert ai 31 de merz. I scolars y i geniturs interessà po jì diretamënter tles scores altes a La Ila por ti ćiarè ala scora y ciafè informaziuns de pröma man.

Lizeum lingustich a la Ila

Lizeum de scienzes umanes a la Ila

Istitut tecnich economich a La Ila

as