Atualità
Jonta provinziela: spiegazions per i ossares anjeniedes
USP – Tla cuestion di vedli monumënc dl fascism iel unì fat n var inant anjenian la spiegazions che dëssa unì metudes sun la tofles pra i ossares ulache ie suplì truep saudeies. Do la lizënza da pert dl minister Bondi vala sën de se mëter a una cun l Cumisser dl Guviern per i particuleres.
Danter l 1937 y l 1939 fovel daujin ala sëides de stat unì fat su trëi ossares cun tant che fova restà di saudeies tumei da plu nazions. Chisc ie unì fai su a Innichen/San Ciana, Malls y Gossensaß. La lizënza de pudëi mëter su la tofles de nfurmazion y a chësta maniera stlù ju la cuestion de chësta sort de monumënc dl fascism ie unida tres l’acurdanza cun l minister ala cultura Sandro Bondi cun l presidënt dla provinzia Durnwalder.
Cun la tofles uelen spieghé co y ciuldì che l fova unì fat su chisc ossares ntan l fascism. Tlo iel suplì saudeies da plu nazions y per respet a chësta persones ne uelen nia zaré ju i ossares ma dé spiegazion.
L test (juntà pro) ie unì njenià dal Archiv provinziel y ie bele unì prejentà al Cumisser dl Guviern y al minister Bondi. Ntan ultimi dis se à l presidënt dla provinzia ancuntà cun i ambolc di chemuns tuchei per rujené ora na soluzion che possa unì azeteda da duc.
as
