Atualità
Jonta provinziela segurea finanziamënt al Istitut Culturel Ladin zënza scurté
USP – Per l’atività y gestion dl Istitut culturel ladin Micurà de Rü, à la Jonta provinziela dat pro n finanziamënt de 404.000 euro. Nce sce la situazion economica atuela sforza la man publica a scurté i custimënc iel sun pruposta dl assessëur Mussner stat mesun seguré al Istitut culturel feter l medemo budget sciche ti ani passei.
I assessëures dla Provinzia de Bulsan sciazea dassënn l lëur che l Istitut culturel cun si sëntes a S.Martin y te Sëlva fej per la cultura ladina. “Udon chësta istituzion publica al prim post n cont de curé y purté inant la cultura y la rujeneda ladina, perchël ons nce dat pro de mantenì l finanziamënt zënza l scurté sciche son sfurzei te d’autri caji” spiega l assessëur ladin Florian Mussner. L Istitut culturel à sëuraprò a siatività nce na funzion de cunsulënza per la Jonta provinziela de Bulsan te cuestions dla rujeneda ladina.
Dassënn cuntënt che l ie unì mantenì l medemo finanziamënt ie nce l presidënt nuef dl Istitut. “Te chisc tëmps iel nce per l Istitut economicamënter rie jì inant, on giapà na bela strutura ma nosc custimënt de gestion ne se fërma nia dan la nflazion, perchël son dastramp recunescënc ala Jonta provinziela” spiega Albert Videsott. Ti proscimi dis tën l cunsëi de istitut na senteda per mëter da nuef la prioriteies de atività. Dlongia dé ora publicazions sun la rujeneda y cultura ladina à nosc Istitut ti ultimi ani nce purtà pro dassënn a nvië via na rë de cuntac cun d’autri istituc, chësc ie aldò dl assessëur provinziel ladin de gran valor per tenì l var cun i tëmps.
Cun i 404.000 euro dai pro dala Jonta provinziela cuer l Istitut Ladin gran pert dl’atività y nce l custimënt de gestion. Autra funtanes de finanziamënt ie sëuraprò i servijes, culaburazions a proiec y sustënies dai chemuns o fundazions. L paiamënt di culaburadëures d’Istitut ie mo a pert y vën curì diretamënter dala Provinzia de Bulsan.
as
