Atualità
Bedaia de arjënt per Runggaldier: auguresc da Durnwalder
USP – Elena Runggaldier ie a Oslo deventeda vizecapionëssa dl mond de saut. L presidënt dla provinzia Durnwalder ti fej i auguresc al atleta de S. Cristina che à cun l saut plu lonch dl di mustrà na gran prestazon sportiva y leprò de bon niërves. Nchinamò ne ova degun atlet o atleta taliana venciù na bedaia tl saut cun i schi.
Elena Runggaldier, 21 ani, à tla prima mance arjont 97,5 metri, l saut plu lonch dl di y ie nce tla finela stata bona de tenì permez a la gran prescion pra la garejeda de majer valor al mond. La favorita Daniela Iraschko dl’Austria à giapà de miëur ponc per l bel sauté se davanian la bedaia d’or. Elena Runggaldier ie vizecampionëssa dl mont, dan la franzëusa Coline Mattel. I auguresc per la bedaia de arjënt de vën dal presidënt dla Provinzia che ie nce assessëur al sport: „Elena, nce sce mo drët jëuna à mustrà gran prufescionalità y se à davanià chësta bedaia cun merit“.
Elena Runggaldier à chësc inviern nce venciù la garejeda olimpica per studënc. Ëila ie nce la sëula al mond a avëi venciù trëi bedaies, una per sort, pra i campiunac dl mond iunior. I auguresc a Elena Runggaldier y la scuadra naziunela taliana vën a inuem dla Jonta proviniela nce dal assessëur ladin Florain Mussner.
Te Gherdëina fovel de lugio 2002 unì scumencià cun na nueva grupa de jëuni a pratighé l saut cun i schi. Te chisc ani à l’atletes tenì l vara cun l svilup dla disciplina y à for inò purtà suzesc. L unì a mance dla cumpania Simona Senoner ie stat n colp pesoch per dut l muvimënt, cun la bedaia da ncuei à la scuadra mustrà de ti vester nce stata chësc tëmp tan rie.
Do l suzes di atlec dl Südtirol pra i campionac dl mond de schi a Garmisch Partenkirchen, ie la bedaia de arjënt de Elena Runggladier la prima di campionac dl schi nordich per l Südtirol y per la valedes ladines. A Oslo iel nsnuet unì sëurandà per l segondo iede tla storia dl schi, la bedaies de majer valor mundiel a ëiles tl saut cun i schi.
as
