Atualità
Limitazions de frabiché sun Mont Sëuc
USP – Normatives plu tleres per frabiché sun Mont Sëuc, ie l resultat dla senteda dla cumiscion provinziela per la defendura dla cuntreda, stata n merdi ai prim de merz. La cumiscion à azetà mudazions al plann de cuntreda per la Mont Sëuc che reverda l frabiché sëura tiera y nce sota tiera.
La bela cuntreda dla Mont de Sëuc, si posizion tla Dolomites y si unicità dëssa unì varenteda dal gran frabiché. La majera mont de Europa dëssa unì defenduda particularmënter. Cie che l possa unì frabicà te chësc raion sota scunanza de cuntreda ie udù dant dal plann de cuntreda per l raion. La prima cumiscion provinziela per la defendura dla cuntreda se à ancuntà te na senteda straurdinera per traté la cajo dla Mont Sëuc. La senteda ie unida meneda dal diretëur de repartizion Flavio V. Ruffini.
L Chemun da Ciastel ova fat la pruposta de limité l frabiché sun Mont Sëuc. La Cumiscion ie n generel stata a una cun la dumanda dl chemun de limité l frabiché sëura tiera canche l vën ngrandì ustaries. I cumëmbri dla cumiscion provinziela ne à nia azetà duc i particuleres dla pruposta. La normatives ie unides adatedes a na maniera che les sibe plu tleres. La maiuranza fova nce de chëla che la sëides muessa unì metudes dant plu avisa. La verscion data pro dala cumiscion per la defendura dla cuntreda vën sën inò mandeda de reviers al Chemun da Ciastel per tëutes de posizion.
as
