Atualità
Furmazion paritetica do la scola mesana: sies prupostes tla Ladinia
USP – Ai sculeies che fina chëst ann la scola mesana vëniel te Gherdëina y tla Val Badia, danter scoles autes y scoles prufesciuneles, pità sies pusciblteies. Dutes chëstes pieta na furmazion do l model scolastich ladin y garantësc nsci l nseniamënt dl tudësch y talian, dl ladin y de rujenedes fulestieres.
Tenian cont che l terminn per la iscrizions ala scoles autes toma ai 31 de merz, lecorda l Ntendënt ladin Roland Verra che dal 1 de setëmber 2011 saral deplù nuviteies tl cheder dla prima aplicazion dla reforma.
Nsci saral tla scoles autes a La Ila, daujin al Istitut Tecnich Economich tl ciamp Aministrazion, Finanzes y Marketing, la puscibltà de crì ora mo danter n Lizeum Linguistich y n Lizeum dla Scienzes Umanes, che anjinia ca ala prufescion educativa. Per ejëmpl ti dà l diplom dl Lizeum dla Scienzes Umanes da La Ila al studënt/ala studënta l titul per pudëi jì diretamënter a lauré tla scolines ladines coche culaburadëur/a pedagogich/a. Sëuraprò possen cun chësc diplom se scrì ite diretamënter ala sezion ladina dla Facultà de Scienzes dla Furmazion a Persenon, zënza messëi fé ejams linguistics de amiscion.
Mé la scola auta paritetica possa seguré la cundizions cultureles per jì inant zënza autra ntegrazions tla prufescions educatives tla valedes ladines. “La richëza data dala preparazion paritetica y interculturela dla scoles autes ladines ie n vantaje che la families dëssa tò n cunsciderazion tl crì ora la scoles autes per si mutans o mutons” lecorda l Ntendënt.
Te Gherdëina saral na cunformazion nueva dla Scola d’Ert che devënta Lizeum Artistich y che pieta śën trëi sezions nueves: ert figurativa, grafica y design. Nce cun chësta urganisazion nueva dl nseniamënt uniral garantì n bon balanz danter materies cultureles y pratica artistica te berstot, zeche de unich te duta la Provinzia. Ai sculeies che à nteres per la mujiga ti uniral dat inant l mesun de pratighé strumënc tl cheder de na cunvenzion danter l Lizeum Artistich y la Scola de Mujiga de Gherdëina.
Tla Scola prufesciunela per l artejanat artistich te Gherdëina iel mesun sibe fé na furmazion de basa che na spezialisazion tl ciamp dl ziplé tl lën y dl depënjer.
Tl Istitut Tecnich Economich „Raetia“ de Urtijëi uniral pità doi spezialisazions: chëla per Economia, Finanzes y Marketing y chëla per l Turism. L unirà segurà inant l mesun de fé na spezialisazion sportiva tl cheder dla furmazion tecnich-economica.
Segurmënter iel na gran vela per jì inant te scola sëura duta la Provinzia, ma l Ntendënt ulëssa auzé ora particularmënter l valor de na furmazion plurilinguala cun de bon resultac documentei te duta rujenedes scolastiches y che al didancuei ie un di ponc de forza per uni studium universiter y per pudëi se fé inant sul marcià dl lëur.
Nfurmazions sun la vela dlascoles autes y la reforma nce tl internet sun www.reformadlascola.bz.it
usp
