Atualità
Jonta provinziela contra l’energia nucleera
USP – Cunduel y nteressamënt per l popul giaponesc, tucà dala gran catastrofes dl tremot, tsunami y desgrazia atomara ie unì purtà dant dala Jonta provinziela te si senteda (da ncuei) dl 14 de merz. I assessëures à rujenà dla tëma dla cunseguënzes nucleares y dla situazion te nosc raions. Te cunferënza stampa à l presidënt Durnwalder sorissà che la Jonta ie contra l’energia nucleera y che pra l referendum teniran chësta posizion.
La catastrofes che à ntan l fin dl’ena tucà tan dassënn l Japan, ie nce states argumënt per la Jonta provinziela fajan referimënt al bujën de energia tlo da nëus. La Talia compra 94% dl’energia da oradecà. “La Jonta provinziela ie contra mplanc de energia nucleera ajache l pericul per la populazion ie massa grant” à detlarà Durnwalder che à nvià la populazion de avëi l snait de se nuzé de energia che respetea l ambient, de pensé plu giut danora. Dantaprima, nsci l presidënt dla provinzia, vala de sparanië mo de plu energia tl cunsum. Pona vala nce de sustenì formes de energia alternativa, mpede tenì dur sun l’energia da funtanes limitedes sciche l gasuele, gas o l’uran. “N ne possa nia giapé dut per debant” à dit Durnwalder, “Sce ulon fé a manco dl’energia nucleera, messon nce azeté vel ntervënt tla cuntreda”. Fajan strom cun la forza dl’ega saral nce manco ega te vel ruves, fajan strom cun mplanc fotovoltaics y cun mulins dal vënt, adruveràn nce lerch tla cuntreda.
Tl referendum d’ansciuda sarà la Jonta provinziela contra mplanc de energia nucleera tla Talia. “Nvion la populazion de tenì pea te chisc referendum” à dit l presidënt. La catastrofa tl Japan ne ie nia da paredlé a Tschernobyl, ajache la ie suzeduda plu dalonc y l ne ie nia da se temëi che la radioatività ruve nchin tlo da nëus. Purempò uniral mantenì la mesurazions per vester daniëura nfurmei sce l ëssa da se mudé velch.
as
