Atualità
Jonta: 2400 cuatieres soziei nchin tl 2015
USP – Aldò dl program dl Istitut per cuatieres soziei IPES uniral nchin dl 2015 frabicà 1200 cuatieres soziei. De ndut dëssa la cumpëida de cuatieres unida auzeda de 2400. La Jonta provinziela de Bulan à (ncuei) ai 21 de merz dat pro l program dl Istitut per cuatieres soziei udan danterauter nce dant de nia plu tò n cunsciderazion la dumandes singularmënter per uni chemun, ma a livel de raion.
L program dl IPES de cin ani, dal 2011 al 2015 vëija dant che tl Südtirol saral de bujën de ndut feter 2400 cuatieres soziei. Riesc do la senteda dla Jonta à l presidënt dla provinzia spiegà che n fej cont che 1200 cuatieres ruva de reviers y vën cumedei ca y pona inò dai via da nuef. La rejons ne ie nia for la medemes y possa dantaprima vester ajache l mor i fitadins, i va a viver te n’auter luech o che i ne tën nia plu ite la cundizions damandedes.
“Per 1200 cuatieres fajons cont de adurvé feter 240 milion de euro. Cun I 60 nchin 80 milion de euro che udon dant uni ann per cuatieres soziei, ie l travert bën da arjonjer” à dit Luis Durnwalder. 20% di cuatieres unirà udui dant per jënt de tëmp, 20% per persones cun handicap y l’autra pert (60%) per duc i autri.
Suvënz iel te un n luech plu dumandes che no cuatieres y tl luech ujin iel massa puecia dumandes per frabiché cuatieres soziei. Per valivé chësta defrëzies y nsci fé a na maniera che la jënt ruve pra cuatieres soziei, à la Jonta provinziela dat pro de tò n cunsciderazion dut n raion y nia plu i singuli chemuns. Te cunferënza stampa à l presidënt dla provinzia nce nunzià la puscibltà che la sëida per ruvé tla graduatories di cuatieres soziei possa unì arbasseda da 25 a 23 ponc.
Cun de ndut 2400 cuatieres soziei de plu permez a chëi da sën, vën l sustëni te chësc ciamp mo aumentà de truep. Ala fin dl 2010 ova l Istitut per cuatieres soziei bele 12.865 cuatieres che ti da da albierch a feter 30.000 persones. Ti ultimi doi programs de frabiché iel nchin ala fin dl 2010 unì njenià 1979 cuatieres, 498 fova mo tl frabiché y 202 tl fasa te proietazion. Per mo d’autri proiec foven tl lëur de mëter a ji l grunt: per 90 cuatieres fova l grunt bele segurà, per 689 foven n tratativa. Dal 2005 nchin al 2010 iel per frabiché y cumpré cuatieres soziei unì fat n nvestimënt de 243 milion de Euro.
as
