Atualità
Jonta provinziela: burocrazia dl Stat y UE ne dëssa nia desturbé l lëur
USP - La Jonta provinziela vëij tla truepa prescrizions stateles y europees n pericul che desturba dassënn l lëur. Tla senteda (da NCUEI) dl 28 de merz iel perchël unì fat ora de lascé crì do pusciblteies costituzioneles per astilé ora prescrizions y truepa burocrazia.
La truepa prescrizions che ie ultimamënter ruvedes da Roma y da Bruxelles ie aldò dla Jonta provinziela de pericul per l’aministrazions, l’economia y nce per l ulentariat. “Dal blo’ prescrizions ne iel belau nia plu mesun lauré” à dit l presidënt Luis Durnwalder riesc do la senteda dla Jonta fajan referimënt ala normes nueves n cont dl stress tl lëur o i cuntroi de cunsum de droga.
I assessëures provinziei ie dla minonga che la Provinzia autonoma ne muessa nia propi azeté uni prescrizion che ie penseda a livel naziunel y europeich, ma che tla Talia vën cuncretiseda a na maniera dassënn cumplicheda. Nscì iel unì fat ora de nciarië n espert de costituzion che dëssa crì do pusciblteies de soluzion. “Sce te d’autri paejes dla Comunità europa an abinà soluzions cun manco prescrizions, pona muessel nce vester mesun tò da nëus” à dit l presidënt dla provinzia.
as
