Atualità
A Lungiarü mët man i laûrs por mioré la strada
USP – Chisc dis scomëncion cun i laûrs por dortoré la strada danter San Martin y Lungiarü. Sön inciaria dl Assessorat provinzial por i laûrs publics vëgnel deslarié y avalié la strada por garantì na miù viabilité y de plü segurëza sön strada.
Bele la pröma edema d’aurì vëgnel arjigné ca danter San Martin y Lungiarü i cantiers por podëi tosc scomencè i laûrs por mioré la strada. „I orun che al vëgnes scomencè por tëmp a na moda che i laûrs vëgnes stlüć jö por la sajun alta da d’isté„ spliga l’assessur por les strades Florian Mussner.
La strada por rové a Lungiarü é 4 metri leria y canche n auto incunta n camionn o n majer meso êl śëgn bindebò ri da passè. Implü val inće debojëgn de adatè la strada ales normes de segurëza da śëgn. L’Ofize provinzial Sorvisc strades à insciö laurè fora n proiet por deslarié y avalié la strada danter le chilometer 4,0 y 5,5. Les proscimes edemes gnaràl laurè te trëi posć sön na lunghëza de indöt 1.500 metri.
La trassa dla strada restarà aladô dl proiet feter anfat. Aladô dles condiziuns geologiches gnaràl deslarié la strada dala pert dessura o dala pert dessot. De chësc nen vara dantadöt debojëgn tles otes. Aladô dles desposiziuns provinziales él preodü che les döes striares sides 2,5 metri leries cun laprò mez meter de ur de strada. Te so punt plü ërt arà la strada na pendënza dl 10%. Le raiun danter San Martin y Lungiarü é plütosc da plan, porchël él ma te püć posć debojëgn de mürs de fondamënta por la strada.
La firma Wipptaler Bau à davagné le concurs por fà i laûrs y le cost é de 533.064 euro. Ajache la proietaziun é gnüda fata dal Ofize provinzial Sorvisc strades ne pësera nia sön le costimënt general. Danter laûrs, provedimënć de segurëza y soma por bojëgns nia odüs danfora, investësc l’Assessorat por i laûrs publics 817.811 euro por la strada da Lungiarü. Por chisc laûrs él odü danfora cater mëisc de laûr.
as
