Atualità
Sujurnanza per muciadives mpede zëntri de identificazion
USP – N cont dla persones che mucia dal’Africa dl nord al costes dla Talia, vëniel a se l dé na situazion nueva. Do la tratatives danter Stat y regions, ulache n sëira (6 auril) à nce rujenà pea l vizepresidënt Hans Berger, tulerà la Talia na streda nueva dajan ora lizënzes de sujurnanza a tëmp. La planificazion per la regions devënta a chësta maniera plu cumplicheda, ma perchël toma l problem di zëntri de identificazion.
Tla tratatives dla regions cun l minister per l ntern Roberto Maroni y l minister per la regions Raffaele Fitto iela n mierculdi sëira (6 auril) jita di imigrei che ruva di per di sun l ijula talian de Lampedusa. “Nchinamò iel ruvà adalerch feter 25.000 persones sun la costes talianes” à dit l assessëur Berger che à reprejentà Südtirol te chësta tratatives. Dal’ancunteda ie unit ora che l Stat ti ie me al problem di muciadives sce l dà ora lizënzes de sujurnanza a tëmp.
“Te chësc mumënt vën la identificazion fata te na pruzedura debota sun la basa dl decret che jirà ncuei (7 auril) n drova y che lascia pro na lizënza de sujurnanza per dut l raion Schengen” dij l vizepresidënt dla provinzia. Davia che gran pert di imigrei uel jì inant ti paejes de rujeneda franzëusa, fejen cont che l resterà ntëur 3-4000 tla Talia. Chisc puderà se muever zënza limitazion y puderà nce dé na si preferënza. “Sce i ne à nia na preferënza, unirai spartì su proporzionalmënter ala regions” spiega Berger.
Per Südtirol uel chësc di che n fej cont de tò su doi desëines de muciadives de viera. “Leprò ruva mo chëi che nes vën mandei aldò dla pruzedura dl articul 20” dij l vizepresidënt dla provinzia. Al plu saral un n percënt di imigrei che resterà tla Talia, sciazei sun na cumpëida de 3-4000 persones. ”A chëst maniera an nce abinà na soluzion per via de fé su zëntri de identificazion. Dal’autra pert ne san nia co che la situazion se sviluperà inant” dij Berger.
L ie dut permò da udëi co che se svilupea l’onda de muciadives de viera che possa unì dala Libia o da auti paejes, passan per la Tunisia. Sce l ie debujën de tò su mo plu persones tl Südtirol uniral daniëura fat ora danter Stat y regions tla culaburazion cun la prutezion zevila per anjenië ca tant che va debujën.
as
