Atualità
Diretives nueves per smendrì l aspité te spedel
USP – La Jonta provinziela à tëut prim pruvedimënc per smendrì 95% dl tëmp da aspité sun di servijes ti spediei. Tla senteda dl 11 de auril (NCUEI) iel unì dat pro i tëmps plu lonc da aspité te. Sce la situazion ne se miurea nia nchin ala fin dl ann, uniral smëndrì la puscibltà de servijes privac ora d’ëura.
Te caji de prëscia muessel aldò dla Jonta provinziel unì garantì l servisc, vijita o ntervënt, te spedel ntan la proscima 24 ëura. Per caji de gran bujën iel unì udù dant che la jënt dëssa giapé l servisc te tëmp de 8 dis. “Te chësta prima categuries de caji ne iel nchinamo nia stat de gran dificulteies” à dit l presidënt dla Provinzia riesc do la senteda dla Jonta. Tëmps da aspité scialdi lonc iel al’incontra unì a se l dé per caji nia de prëscia o caji che se lascia prugramé. La Jonta provinziela se damanda che l’Unità sanitera garantësce chisc tëmps mascimi de aspité nchin ala fin dl 2011, autramënter uniral smendrì la puscibltà de servijes privac te spedel. Acioche i pazienc muesse aspité de manco à la Jonta provinziela udù dant che la pruzedura de registrazion muessa me unida fata pra la prima vijita y che l sibe pona l dutor a sëurandé la proscima data. Per na miëur nfurmazion danter dutor de cësa y dutor spezialisà muessel unì fat protocoi. “Me sce l ne ie nce cun chisc pruvedimënc for mo nia mesun giapé na data per tëmp, puderà unì pità na vijita privata te spedel” à dit l presidënt Luis Durnwalder. Per aspité manco giut muessa i pazienc da si pert nce azeté de furné vel iede te n spedel plu da lonc. L presidënt dla provinzia à nce lecurdà che truep pazienc uel se lascé vijité da dutores de inuem y ie nce a una de aspité plu giut dan jì da n auter dutor.
Ultimamënter fova unì lamënteles sun i tëmps da aspité per n servisc de spedel. Ulache l ie na gran lista de pazienc che aspieta, semea che l vën nce pità vijites privates te spedel. “Ne azeton nia che la ruve tan inant che chiche à l muet giapa riesc na vijita privata y che i autri muessa aspité scialdi plu giut” à dit Durnwalder sorissan che ti spediei vëniel pità n servisc de bona cualità ma che dal’autra pert uelen nce ti jì do ala lamënteles.
Ajache la Chëurt costituzionela ne ova nia azetà la regulamentazion dla Provinzia de Bulsan de n paiamënt plu aut per schivé l servisc privat udù dant dal Stato, an tl Südtirol me lascià pro chisc servijes privac ora de ëura. N dutor che à giapà l’autorisazion muessa n iede fé 40 ëura de servisc al’ena y possa sëuraprò pité nchin trëi ëura de vijites privates te n’ena. Chësc ie puscibl ntan l’ena dala 5 ala 7 domesdì, de vënderdi dala 3 ala 7 domesdì y la sada dala 8 da duman nchin la 12 da mesdì.
Sun feter 1100 dutores tla provinzia de Bulsan, à 153 damandà de pudëi pité servijes privac tl spedel y 13 ora dl spedel.
as
