Atualità
Sëurandat l Masterplan per Gherdëina
USP – Ciun che dëssa vester l svilup urbanistich de Gherdëina ie unì studià da grupes de lëur di chemuns de Gherdëina y chemuns ujins, cun l sustëni dl’Academia Europeica EURAC. I resultat, metù adum tl cunzet tlamà Masterplan per Gherdëina ie unì sëurandat ufizialmënter ai ambolc de Sëlva, S.Cristina, Urtijëi, Ciastel y Laion per l’apruvazion y per la realisazion. Per l assessëur provinziel Laimer ie chësc n strumënt inuvatif de planificazion urbanistica de ejëmpl nce per d’autri raions.
La puecia lerch che ie te valeda muessa unì planificheda a na maniera da mantenì nce tl daunì la cualità de vita. Per arjonjer chësta mira se à per l prim iede metù adum i trëi chemuns de Gherdëina cun Ciastel y Laion per lauré ora n cunzet deberieda. Cun l Masterplan se oven tëut dant de abiné manieres per seguré la fundamënta de davani y tl medem tëmp nce stravardé la cuntreda y l ambient. I ponc de majer nteres ie la mubilità, i raions artejanei, la nfrastrutures per duta la valeda y sambën i cuatieres per i jëuni da tlo.
N juebia ai 14 de auril ie l Masterplan unì sëurandat ai cin ambolc acioche i debe ufizialmënter si bënsté sun l cunzet y acioche posse scumencé la realisazion dla vijions. Un di vares zentrei sarà chël de ntegré i resultac dl studi ti planns urbanistics de Sëlva, S.Cristina, Urtijëi, Ciastel y Laion. „L Masterplan Gherdëina ie n proiet pionieristich che dà nce mpulsc per cunlië de tei cunzec ala lege urbanistica provinziela“ à dit l assessëur Michl Laimer pra la sëurandata dl Masterplan. L assessëur al’urbanistica se mbincia che nce d‘autra assoziazions de chemuns planificheie si raion y si svilup sun l ejëmpl de chësc Masterplan.
Cun l’assistënza dl Ufize provinziel per planificazion urbanistica cun Wirna Bussadori, laurerà i cin chemuns sën sun na pruposta de mudazion ala lege urbanistica provinziela.
L plann de urientamënt ie unì svilupà cun l sustëni scientifich dl’Academia Europea EURAC. “L Masterplan ne ie nia na reazion a dificulteies che ie bele, l ie plu che auter n strumënt che planifichea l daunì cun vijions” dij Lisa Kofink dl’Eurac.
L Masterplan fej referimënt al svilup ti proscimi 20 nchin 40 ani y cuntën perchël mires a livel de valeda. La trëi seves prinzipeles ie l deberieda tla valeda, la varietà dla valeda y manco trafich tla valeda. L ie unì laurà ora mires da arjonjer y strategies de realisazion.
Cun la sëurandata dl Masterplan Gherdëina ai ambolc Peter Mussner (Sëlva), Eugen Hofer (S.Cristina), Ewald Moroder (Urtijëi), Ambros Hofer (assessëur de Ciastel) y Sefan Leiter (Laion), muessa i chemuns sën lauré inant. L plann dëssa giapé l bënsté di singuli cunsëies de chemun y possa pona unì realisà.
as
