Atualità
Program nuef di cursc per nsenianc y educadëures ladins
USP - Ala furmazion dla persunalità y ala furmazion tl ciamp dla materies de nseniamënt ie dedicà l program nuef di cursc che vën mo dan Pasca partì ora ai nsenianc y educadëures dla scoles y scolines ladines. Sun passa 90 plates vëniel prejentà passa 90 cursc che unirà pitei danter juni 2011 y merz 2012. Sëuraprò a chisc curs, possa nsenianc dla valedes ladines nce fé pea la furmazion piteda dai dipartimënc ala furmazion dl’autra doi grupes de rujeneda.
“Sun la richëza y l valor dla furmazion sons segur duc a una: la persona y la prufescionalità de chësta se miurea tres l pensé do a co y a cie che vën fat uni di te scola, tres l barat de ideies cun d'autri y d'autres y tres l jì sot ala cuestions y ala problematiches deberieda cun esperc che se dà ju ti ciamps dla educazion y dla didatica che toca avisa l mond dla scola” nsci la paroles danora dl assessëur ladin Florian Mussner, l ntendënt Roland Verra y l diretëur dl ufize per inuvazion y cunsulënza Theodor Rifesser.
Tl cunzet di program di cursc iel unì dat pëis particuler a la furmazion de utl per abiné soluzions de problematiches sozieles tla scoles y tla scolines. Danterauter vëniel pità cursc ulache n se da ju cun la problematica de genitores spartì, la viulënza y prevenzion ala viulënza o l mparé soziel tres l juech y muvimënt.
Nuvità da chëst ann ie che per l prim iede iel nce unì tenì cont di nsenianc dla scola prufesciunela che de setëmber fajerà pert dla direzion dl Lizeum d’Ert a Urtijëi. I cursc vën pitei a rotazion danter la trëi rujenedes de nseniamënt, ladin, tudësch y talian. Per nsenianc de nglëisc vëniel nchinamei pità ucajion de fé cursc te raions de rujeneda nglëija.
as
