Atualità
L nteres al servisc ai media ladins devënta for majer
USP – Dan doi ani, ai 23 de auril, ova l Ufize stampa dla Provinzia de Bulsan mudernisà si plata internet tla rujeneda ladina. La cumpëides de tanc che se à nuzà de chësta plata web cun i comunicac, fotos, ntervistes audio y video desmostra che l nteres per l servisc de nfurmazion tla rujeneda ladina devënta for majer. Ntan l ultimo ann iel unì cumpedà 37.884 vijites.
Sota l’adres www.provinzia.bz.it/uspl iel da udëi la comunicazion da pert dla Jonta provinziela y di servijes dla Provinzia de Bulsan che vën fata per ladin. Dantaldut per i media de rujeneda ladina, ma nce per duc in teressei vëniel sun chësta plata web publicà comunicac stampa cun fotos, video y ntervistes a usc. Te chisc prim doi ani, da canche la plata internet dl Ufize stampa fova unida muderniseda nce per ladin, iel unì cumpedà 71.853 vijites. L prim ann oven cumpedà 33.969 vijites, l segondo ann 37.884 vijites. „L aumënt de mo n iede 11,5% di vijitadëures y la soma daujin a 38 mile vijites desmostra che l servisc de nfurmazion tla rujeneda ladina vën priejà dassënn“ dij l assessëur ladin Florian Mussner, juntan che la zifres muessa sambën unì ududes n relazion ala cumpëida dal populazion ladina. La plata web ladina dl Ufize stampa à ntan l 2010 arjont n mesaria 3.141 vijites al mëns, che ie 28% de plu permez al ann dant. Ntan i prim trëi mënsc dl 2011 ie chësta mesaria mo n i iede auzeda arjunjan 3.893 vijites al mëns, n sëni che l nteres ndevënta for majer.
La pert zentrela dla plata internet per ladin dl Ufize stampa ie i comunicac cun fotografies. Truep nteres iel nce unì mustrà per i video y la ntervistes a usc per ladin. “Pudëi udëi y audì la nutizies tla rujeneda ladina ie na maniera de comunicazion che tën l var di tëmps” sorissea l assessëur provinziel ladin. Sun la plata internet possa uni un fé l abunamënt debant ala nutizies tres e-mail y ala zaita provinziela.
L servisc dl Ufize stampa tla rujeneda ladina ie trëi iedesc de utl: per la redazions, per duc i nteressei y per la rujeneda. I comunicac vën mandei ora a duc i media de rujeneda ladina y tl medemo tëmp possa duc i nteressei liejer do la nuviteies per ladin tl internet.
“Scrì de cuestions aministratives per ladin ne ie nia for tan scëmpl y chësc servisc desmostra che n possa se nuzé de nosta rujeneda nce te chisc caji. Per la cura dla rujeneda iel dessegur n cuntribut mpurtant” spiega l assessëur ladin.
La Jonta provinziela y l’aministrazion publica dà inant la nfurmazions sun si atività tres l Ufize stampa y si lëur ie a chësta maniera nce trasparënt. La comunicazion ala stampa cuer nsci l duvier de nfurmé y ie tl medemo tëmp nce n servisc per la populazion.
as
