Atualità
Provinzia y chemuns per n model nuef de finanziamënt
USP – La maniera de finanzië i chemuns dëssa unì laureda ora da nuef. De chësc ie (inier) ai 28 de auril stai a una la Jonta provinziela y l Cunsëi di chemuns. Da nuef dëssa nce unì metù a jì la spartizion di scioldi danter i chemuns per arjonjer na spartizion plu giusta.
Ti ultimi ani iel la pert dl bilanz provinziel che reverda i chemuns unì marciadeda ora ann per ann danter la Jonta provinziela y i chemuns. Da chësc model ne à i chemuns nia trat prufit, perchël dëssa l model śën unì laurà ora da nuef. “On rujenà de plu modiei, ma ne son mo nia ruvei a una ajache duc i modiei a pertes positives y negatives” à dit l presidënt Luis Durnwalder do l’ancunteda dla Jonta provinziela cun l cunsëi di chemuns.
L model nuef pudëssa nce vester l vedl, chël che fova unì adurvà nchin dan n valgun ani. Chësc vëija dant che i chemuns giapa na pert segura – n rejona de 13,5% - dla ntredes provinzieles. Assessëures provinziei y ambolc à nce rujenà de formes de finanziamënt di chemuns tres leges spezifiches sëuraprò al finanziamënt tlassich. “A chësta maniera se sparaniessen truepa burocrazia” à dit Arno Kompatscher, presidënt dl Cunsëi di chemuns.
Da nuef dëssa nce unì metù a jì la regulamentazion per spartì i mesuns danter i singuli chemuns. “Nchinamò ie gran pert di scioldi unì spartì su aldò dla cuota per persona, n pratica aldò dla cumpëida dla populazion” à dit Kompatscher. Chësc model dëssa unì baratà cun n model che se stiza sun i custimënc che toma veramënter sun i chemuns, che sibe nscì nce plu giust. Chësta pruposta vëija dant sies ponc de referimënt: la cumpëida de sculeies tla scoles de ublianza, jënt de autri luesc che vën a lauré, la strutures publiches, la nuetes afitedes y la cëses. Sëuraprò dëssel nce unì n finanziamënt segur unfat per duc i chemuns. “Tenian cont de chisc sies ponc, ie i chemuns boni de curì feter 90% de si custimënc” à dit l presidënt di chemuns. Pra la spartizion dl finanziamënt dëssel nce unì tenì cont dla ntredes de uni chemun, che possa vester la partezipazion a na zentrela dal strom y la chëuta sun la puscions ICI. “La prupostes ie unides analisedes da tramedoi pertes y n generel iesen a una” à dit l presidënt dla Provinzia.
Plu flessibiltà uel i chemuns nce arjonjer pra i custimënc. Nchinamò ie vel cuntribuc provinziei liei ala cundizion che i possa me unì adurvei per curì spëises curëntes. Tl daunì dëssel nce vester mesun finanzië nvestizions cun chisc scioldi. N majer sustëni per finanzië nvestizions dëssa nce unì arjont te chëla che l vën ngrandì l fond de rotazion. Tres chësc fond dëssa unì finanzià duc i nvestimënc de n chemun sëura 100.000 euro.
as
