Atualità
Bront de Carolina Kostner, auguresc da Durnwalder y Mussner
USP – Carolina Kostner à venciù la bedaia de bront pra i campionac dl mond de jadiné a Mosca. Per chësc suzes mundiel ti fej l presidënt dla provinzia Luis Durnwalder i auguresc y n gran cumplimënt „Carolina à cumbatù, la à tenì permez y à arjont la bedaia de bront. Per ëila n suzes y per nosta provinzia n unëur y na gran legrëza“.
Carolina Kostner ie ncuei domesdì, 30 auril, jadineda la Kür cun gran grazia. Tl program de ublianza iela tumeda n vënderdi y à messù se cuntenté dla sesta posizion provisoria. Tla finela di campionac dl mont à l’atleta de Urtijëi mustrà dut si savëi fajan l program cun de plu sauc cun gran prufescionalità y zënza tumé. „Carolina ie stata bona de se miuré de trëi posizions y se à davanià la bedaia de bront cun gran merit. Venciù à la giaponeja Miki Ando dan a Yu Na Kim dl Sudcorea. Mi cumplimënc ie a inuem de duta la Provinzia de Bulsan“ nscì l presidënt che ie nce assessëur provinziel al sport.
Per l’atleta de 24 ani se tratel bele dla terza bedaia pra i campionac dl mond de jadiné artistich. Dl 2005 ovela ënghe vënciù bront, dl 2008 fovela deventeda vizecampionëssa dl mont. „L suzes de Carolina me fej gran legrëza y porta unëur a duta la populazion ladina“ nscì l assessëur ladin Florian Mussner.
La bedaia mundiela de bront ti dà rejon a Carolina de vester inò ruveda de reviers pra si trainadëur Michael Hut tl zënter agonistich de Oberstdorf. Do plu ani ovela dan doi ani purvà na sajon tl’America che ne ti à nia butà, na esperienza nia cis positiva che ti à dal’autra pert judà da pont de ududa psicologich. Cun l suzes a Mosca ie Carolina de reviers sun l podium mundiel. „Per l Südtirol uel chësc di n gran ejëmpl per i jëuni y tl medemo tëmp nce de vester n’ambasciadëura de gran valor a livel nternaziunel“ nscì Durnwalder.
as
