Atualità
Soluzion cun na scipa dan l relief de Mussolini
USP - La Jonta provinziela à tëut na dezijion provisoria per l relief fat tl tëmp dl fascism, sun l palaz dla finanzes a Bulsan. Zënza tuché l relief nstës, ma per scunjeré la pruvocazion dl fascism uniral fat dansù na scipa che n ne vëija nia tres.
La Jonta provinziela à ulù na soluzion scëmpla y che se lascia realisé te puech tëmp. Tenian cont dl prinzip de nia desdrù l relief che ova fat l artist Piffrader, ma tulan demez la pruvocazion ie duc i assessëures provinziei stai a una de lascé da udëi chësc relief do n revestimënt. Perchël an cris ora la soluzion de na scipa (opaca) dan su, che n ne vëija nia tres. La soluzion ie provisoria ajache n ne sa mo nia sce l palaz dla finanza vën ressanà o sce i ufizies unirà trapinei nzaul d’auter.
“Aldò dla lëtra dl minister Bondi pudëssen nce tò demez l relief y l mëter te n museum. Ma davia che ne on nia n museum adatà per tan n gran relief, ons ulù l lascé ulache l ie y fé dainora na luegia de desposizion” à dit l presidënt Durnwalder (ncuei) ai 2 de mei do la senteda dla Jonta. “A chësta maniera sarà l relief da udëi per chëi che à nteres, ma ne sarà nia plu na pruvocazion fascista”.
Te chësta dezijion an nce ulù tré ite l chemun de Bulsan che ie unì reprejentà tla senteda dla Jonta provinziela da si ambolt. Aldò de Durnwalder ie l ambolt de Bulsan de prinzip stat a una cun la soluzion nce sce l ne à mo nia pudù ti la prejenté a si assessëures de zità.
as
