Atualità
La Jonta provinziela uel baraté o vënder puscions per pudëi frabiché
USP – Per avëi plu mesuns a desposizion da frabiché stredes, strutures y cuatieres à la Jonta provinziela tratà la puscibltà de vënder puscions che ne vën nia adurvedes. L presidënt dla provinzia fej cont te tré ite a chësta maniera passa 100 milion de euro da pudëi adurvé per strutures mpurtantes che n ne uel nia lascé aspité.
I assessëures muessa ti proscimi ani fé cont che l bilanz provinziel ne deventerà nia majer y dal’autra pert che l sarà debujën de plu scioldi per finanzië strutures sciche stredes de zircunvalazion, scoles y zëntri saniteres. “Me tla stredes dajons ora feter 300 milion de euro al ann – nsci Durnwalder - ma cun chisc scioldi son me bon de purté inant proiec bele scumencei sciche la stredes de zircunvalazion dla ziteies o la ntreda tla Val Badia.”
Na soluzion a chësta dificultà dëssa unì abineda te chëla che l avëi provinziel vën cialà do avisa y vendù o baratà puscions che n ne adrova nia plu, sciche per ejëmpl vedla puscions de casermes. Dajan ca de tel puscions iel per la Provinzia mesun cumpré strutures che ie debujën, sciche per ejëmpl cëses per sculeies.
I scioldi che vën ite a vënder dëssa unì metui te n fond cun chël che n possa pona finanzië strutures mpurtantes. “La ntredes fossa a chësta maniera tachedes” à spiegà Durnwalder. Te Jonta provinziela iel nce unì rujenà dla puscibltà de vënder cuatieres dl Istitut per cuatieres soziei. “Dant aspitons mo sun na relazion dl assessëur Tommasini, per pudëi pona tò na dezijion” à dit l presidënt dla Provinzia.
La Jonta provinziela ie stata a una de mpresté su 50 milion de euro per pudëi purté inant plu debota l barat de casermes sun cuatieres, danter Stat y Provinzia. “Te chësc mumënt sons me boni de mëter sun na pert 30 milion de euro al ann per frabiché cuatieres da pudëi baraté sun puscions de casermes. Nchin che ne on nia finà i cuatieres, ne pudons nce nia sëurantò la casermes che adurvon y sun chëles che i chemuns aspieta bele ert” à dit l presidënt dla Provinzia. L mprëst dëssa dé na sburdla al frabiché, la puscions che n giapa sun i cuatieres dëssa pona inò unì vendudes y cun i scioldi trai ite uniral paià i debic. “A chësta maniera ruvons inant cun l frabiché ma zënza vester de pëis al bilanz provinziel” à spiegà Durnwalder.
as
