Atualità
Ancunteda de scoles paritetiches ti Grijons
USP - Da n valgun ani incà iel ti luesc plu alauta dl’Engiadina na scola paritetica. Da permò ie i diretëures dla scoles ladines jic a vijité chësta scola per ancunté i respunsabli.
Tl cheder di cuntac de culaburazion danter la scoles dla Val Badia y de Gherdëina cun chëles di Grijons, ie na delegazion de diretëures cun l ntendënt Roland Verra stata ai 5 y ai 6 de mei 2011 a Maloja tla Engiadina. Te chësc pitl luech suinsom dla valeda al cunfin cun la Val Bregaglia de rujeneda taliana, à la aministrazion locala metù su na scola paritetica tudësch-taliana, propi tenian cont dla situazion tan particulera de chël luech danter la arees linguistiches dl Grijon. Tl’ancunteda cun i respunsabli dl cunsëi scolastich, dl chemun y dla scola cun i diretëures dla valedes ladines iel unì fat l cunfront danter i doi sistems scolastics tan medemi y mpo tan autramënter.
L model de Maloja funziunea do l sistem „una rujeneda, una persona“, ntan’ che tla valedes ladines vën duta trëi la rujenedes nseniedes tla scoles elementeres dal medemo nseniant. De gran defrënzes iel ënghe per chël che à a cie fé cun l urdenamënt scolastich y cun l tò su personal nseniant che ti Grijons ie defin tla mans dl chemun y dl cunsëi scolastich y che da nëus ie regulamentedes da despusizions legislatives y aministratives dla Provinzia.
Per studië plu avisa la cuestions pedagogiches y educatives di doi sistems, an fat ora de fé na ancunteda chësc autonn tla scoles di luesc ladins dla provinzia de Bulsan.
La delegazion ladina, acumpanieda dal diretëur di servijes de inuvazion y cunsulënza Theodor Rifesser y dala Ispetëura dla scoles Rosmarie Crazzolara, à nce tëut l’ucajion per se fé n cheder dla situazion culturela y dla mendranza rumancia ti Grijons.
usp
