Atualità
Cunvëni sun la nuet di fuesc: la Jonta azetea l program
USP – I storics Rolf Steininger, Leopold Steurer y Carlo Romeo prejenterà ai 9 de juni i ponc de ududa sun la nuet di fuesc. La sëira cureda al Archiv provinziel, sun scumenciadiva dla Jonta provinziela, unirà tenida tla cësa Kolping a Bulsan.
Dan 50 ani, tla nuet dal 11 al 12 de juni 1961 fovel te dut Südtirol unì stlupetà 37 stendri dala strom. Chësta nuet, numineda plu tert la nuet di fuesc, fova l mumënt plu pesoch y n mumënt de mudazion dla crisa n cont dl Südtirol.
Zitadins de cultura tudëscia, taliana y ladina vëij la nuet di fuesc da ponc de ududa drët defrënc. Per chësta rejon uel la Jonta provinziela purté adum chisc ponc de ududa te na sëira de descuscion. Lepold Steurer prejenterà la nuet di fuesc dal pont de ududa dla grupa tudëscia, Carlo Romeo da pont de ududa talian y Rolf Steininger prejënta co che n à udù chësta situazion a livel nternaziunel. “La se trata de reprejentazions ogetives de chël che ie suzedù dan 50 ani tres esperc de storia. Duc i nteressei dëssa pudëi scuté su cie che fova suzedù ntlëuta y i dëssa giapé ucajion de fé na descuscion cun esperc” à dit l presidënt Durnwalder.
La sëira ai 9 de juni sun la nuet di fuesc scumëncia dala 6 domesdì tla Cësa Kolping a Bulsan.
as
