Atualità
Ispetëures dl lëur fej saré n cantier a Urtijëi
USP – A Urtijëi à (ncuei) ai 24 de mei messù unì fermà i lëures y sarà n cantier ajache l ne ie nia unì garantì la segurëza di lauranc. I ispetëures dl Ufize provinziel per scunanza tecnica dl lëur à messù tò chësc pruvedimënt ajache l manciova defin la mesures de segurëza y ajache l ie unì frabicà zënza respeté la regules scrites dant per lege. De plu lauranc à laurà a na autëza de feter 10 metri de autëza zënza vester segurei.
“Na pert dl frabicat tl zënter de Urtijëi ie unì fat defin zënza l gherist” spiega l diretëur dla repartizion per l lëur Helmuth Sinn, nunzian nce che sun l cantier fovel n gran sotsëura. Da pert dla Repartizion per l lëur vëniel fat al savëi che l manciova defin la coordinazion prufesciunela.
“L vën for inò tëut ala lesiera che tel situazions periculëuses possa purté a desgrazies cun cunseguënzes fatales” lecorda l diretëur Sinn n cont dla prevenzion ntan l frabiché. L ie l duvier dla repartizion provinziela de tò pruvedimënc per stravardé la sanità di lauranc.
L cantier a Urtijëi ie unì śarà y la firma de costruzion ie unida data sëura pra la Procura dla Republica. Aldò de Sinn iel l prim secuestramënt de n cantier do passa n ann.
“La segurëza y la sanità tl lëur ti sta dassënn a cuer al’aministrazion provinziela” sorissea l assessëur Roberto Bizzo. “Sce l ne vën nia tenì ite la regules contra la desgrazies a na maniera tan tlera sciche te chësc cajo, ie l saré dl cantier per defënder i lauranc n bujën de gran priorità”.
as
