Frabiché | 06.06.2011 | 16:21

Jonta provinziela: realisazion dla lines da Pruca al tunel tl Prëner

USP – La linia danter Pruca y Furtëza muessa unì fata deberieda cun l tunel dl Prëner aldò dla dates prugramedes. Chësc se damanda la Jonta provinziela do che la à (NCUEI) ai 6 de juni fat l pont dla situazion.

L Cumité interministeriel per la programazion economica (CIPE) à garantì 1,6 miliardes de euro per la linies da ruvé permez al tunel dl Prëner, danter Pruca y Furtëza. “Per nëus ie chësc toch de priorità ajache cun la pendënzes che on śën ne possa la ferates spezieles nia passé” à dit l presidënt Durnwalder. Ma sce n ie boni de smendrì la pendënzes dla scines che iel bele tla val d’Isarch saral mesun nuzé de plën l tunel dl Prëner. “Chësc spiega nce ciuldì che l ie debujën de frabiché la scines danter Pruca y Furtëza deberieda cun l tunel nstës. Ma de cuncret ne iel mo nia unì fat truep y chësc nes fej nia sté saurì” à dit Durnwalder.

La Jonta provinziela à fat ora de ntervenì pra i ministeres de cumpetënza y pra la Ferata per mené do la proietazion dla linies da ruvé permez y purté dant la dates fates ora. Per la scines nueves danter Pruca y Furtëza dëssel unì stlut ju la preparazion tecnica nchin ala fin de agost 2011, nchin de fauré 2013 dëssel unì sëurandat la ncëria de proietazion, nchin de merz 2014 dëssa la CIPE delibré la finanziamënt y nchin de utober 2015 dëssel unì sëurandat i lëures. “Cun chësta dates pudons calculé che la realisazion sibe fineda nchin de setëmber 2022” à dit Durnwalder.

N pont critich unirà a se l dé nia dalonc dala valedes ladines, a Pruca. Aldò de Durnwalder iel iust a Pruca debujën de proieté pea pruvedimënc per defënder la populazion dala fuera. I esperc dla Provinzia dëssa perchël cumpanië la proietazion dla scines nueves per pudëi a chësta maniera garantì i nteresc di zitadins. La Jonta provinziela se damanda che n abiné a soluzion a Pruca sota tiera o stluta ite ulache la scines nueves jirà adum cun chëles che ie bele.

as