Atualità
L catalogh dla Trienala Ladina y dl pest Argreiter ie njenià
USP – L Museum Ladin Ciastel de Tor à l ann passà dedicà gran mpëni per l’ert metan a jì doi cuncorsc d’ert. Tres la „3ª Trienala Ladina“ y l pest de scultura “Richard Agreiter“ à artisc' ladins fat de bela opres che ie nce unì valutedes y analisedes tres rezenscions. Ai 7 de juni iel tl Museion a Bulsan unì prejentà n catalogh de chisc lëures scrit te cater rujenedes.
L critich d’ert de inuem nternaziunel Adam Budak, che ie nce stat curadëur dla „3ª Trienala Ladina“, à curà l catalogh di doi cuncorsc d’ert dl Museum Ladin. Dlongia la fotografies dl’opres y di artisć iel nce unì publicà rezenscions dl curadëur, de critics d’ert y de cumëmbri dla giuries. L ie unì a se l dé na cumbinazion drët nteressanta che spiedla l’atività artistica de cater raions ladins. Pra la mostra „3ª Trienala Ladina“ fovel unì cris ora Romana Prinoth de Sëlva, Ester Schena dl Cianton di Grijons, Barbara Tavella da La Val, Veronica Zanoner da Moena, Peter Demetz de Urtijëi y Claus Vittur da La Ila.
Pra la prejentazion dl catalogh à l assessëura Sabina Kasslatter Mur, l curadëur Adam Budak, l artist Richard Agreiter y la diretëura dl Museion Letizia Ragaglia unerà la gran atività artistica tla valedes ladines. L catalogh ie esprescion dl bon livel artistich dla jënt ladina. L diretëur dl Museum Ladin Stefan Planker à rengrazià dla sensibltà de viers dl’ert ladina che ie nce unida mustreda cun l finanziamënt de chësc catalogh.
L catalogh ie unì dat ora dala cësa editoriela Silvana Editoriala tla cater rujenedes ladin, tudësch, talian y nglëisc. Ntan la proscima enes uniral partì ora te plu paejes dl’Europa, America y Japan ulache n l giaterà al priesc de 32 euro.
Museum Ladin ova metù a jì l cuncors cun mostra “Tirenala Ladina” per dé valor ala creazions artistiches tl mond ladin y dé la puscibltà ai artisć de se mustré y de se prejenté ala critica. Fat pea à 36 artisć dla valedes ladines dla Dolomites y per l prim iede nce dai Grijons y dal Friul. La opres dedichedes al tema “Tl museum per comuniché…” ie states da udëi ntan l ultim instà tl Museum Ladin a San Martin de Tor.
L pest de scultura „Richard Agreiter“ ie destinà a scultëures che lëura y vif ti raions dl Tirol storich (Tirol dl Nord, Tirol dl Ost, Südtirol y Trentin) y tla valedes ladines de Badia, Gherdëina, Fascia, Fedom y Ampëz. Te chësc cuncors fovel unì damandà che i scultëures ebe n liam particuler cun la cultura, la storia y la tradizion dl post. Tres chësc pest an sustenì l’ancunteda y l barat culturel danter artisć ladins y chëi dl’autra pertes dl Südtirol, Trentin y dl Tirol. L cunesciù artist Richard Agreiter à abù chësta idea y à nce dunà l pest de 10.000 euro. Danter i 53 artisć dl Tirol storich che à fat pea l ann passà, ie l pest jit a Kathrin Partelli de Bulsan.
as
