Atualità
Mo n iede sarà l cantier a Urtijëi
USP – A Urtijëi à (inier) ai 8 de juni mo n iede messù unì s’arà n cantier. “L ne ie mo mei suzedù che n cantier a messù unì s’arà doi iedesc te tëmp de doi enes per rejons de segurëza” dij l diretëur dla repartizion per l lëur Helmuth Sinn, dessenà y cun festide.
L prim iede ova i ispetëures dla repartizion provinziela per l lëur śarà l cantier ai 24 de mei. N’ena do an inò pudù tò demez l secuestramënt ajache l fova ntant unì fat i pruvedimënc de segurëza per i lauranc.
Fajan cuntroi, à i ispetëures dl Ufize provinziel per scunanza tecnica dl lëur ai 8 de juni messù cunstaté che la firmes ne à nia cunscidrerà la regules de segurëza y che i lauranc fajova si lëur te situazions de pericul. “Nce chëst iede ne fovel nia unì fat i pruvedimënc de segurëza, lauran inant zënza tenì cont di pruvedimënc udui dant per lege” dij l diretëur de repartizion Sinn. De plu lauranc laurova a na autëza de feter 7 metri, tl pericul de tumé ju dedite pert.
Nce l assessëur per l lëur, Roberto Bizzo à festide ajache la scunanza di lauranc ne vën mo for nia tëuta su cun scerietà. “La cunseguënzes dramatiches dl mancë de pruvedimënc de segurëza ons chisc dis messù udëi tl cajo de doi morc” dij l assessëur Bizzo.
“For inò vëniel tëut ala lesiera che tel situazions de pericul possa tosc deventé pericul de mort” lecorda Sinn. L ie si duvier de ntervenì per defënder la sanità di lauranc.
L cantier a Urtijëi ie unì sarà mo n iede y de plu firmes ie unides dates sëura pra la Procura dla Republica.
as
