Atualità
Instà tl Museum Ladin: cater ativiteies al’ena cun escurscions, cursc, mostres y mujiga
USP – Ntan l instà se gëura l Museum Ladin a ativiteies cultureles nce ora de si sënta tl Ciastel de Tor. Escuriscions tl parch naturel Puez Odles uni merdi, la jita tla Val di Murins de mierculdi, l domesdì per mëndri de juebia y l curs de ladin de vënderdi pieta a zitadins y families da tlo y fulestieres ucajion de mparé a cunëscer la particulariteies dla Ladinia tres spiegazions y prejentazions cumpetëntes.
Cater ativiteies al’ena danter geologia dla Dolomites, natura y cultura di vedli murins y n program speziel per mëndri che ti vën ancontra al families cun leprò mo n pitl curs de ladin per turisć. Dut chësc pieta l Museum Ladin nchin ala fin de agost. La vela de ativiteies vën pitedes sibe a fulestieres che nce ala jënt da tlo.
Sëuraprò iel tl Museum Ladin mo da udëi la mostra dla ferata de Gherdëina danter lecorc y vijions. Ai 14 de lugio puderan audì n cunzert dl Ensemble Vinorosso metù a jì n culaburazion cun Badiamusica. Tl tublà da Nives te Sëlva uniral ai 12 de agost giaurì la mostra “Oswald von Wolkenstein in Art 1961-2011”. L medemo di uniral a S. Martin de Tor, tla sënta dl Ćiastel de Tor giaurì la mostra “Ćiarè y udëi” n culaburazion cun l Ufize provinziel di parcs naturei.
----------------------------------------
LA GEOLOGIA DLES DOLOMITES
Les Dolomites – Patrimone Natural dl’UNESCO cun escursciun acompagnada tl Parch Natural Pöz-Odles
Danmisdé: I piëis ia ala descurida dla geologia dles Dolomites, n iade tl tëmp che ves portarà derevers de cënć de miliuns de agn, canche le mer implî fora le raiun olache al é al dedaincö les Dolomites. Cun na presentaziun powerpoint ves lasciarà n espert vire danü la storia dl passè. Dedô gnarâl fat esperimënć chimics plü avisa y analisé corëć y peres tipiches dl raiun.
Domisdé: N paleontologh ves acompagnarà tres le percurs geologich de Pütia, olache an vëiga n valgönes dles formaziuns geologiches plü importantes dles Dolomites: la formaziun a Bellerophon, testemone dla plü gran estinziun de massa de düć i tëmps; la formaziun de Werfen gnüda dedô, te chëra che la vita à indô metü man de se desfarenzié; tla finada la Dolomia dl Sela y la Dolomia dl Scilier, resć de na gran bariera coralina fossila, che forma i parëis ërć de Pütia.
Perioda: vigni mertesc, dai 05.07 ai 06.09.2011
Danmisdè: dales 10 ales 11 tl Museum Ladin Ćiastel de Tor
Domisdé: dales 14.30 fina ales 17.30 ca. - Plaza da parchè de Börz
Prisc: por entrames les iniziatives: 7 Euro
Prenotaziun obligatoria: Museum Ladin Ćiastel de Tor tel. 0474 52 40 20 o tles assoziaziuns turistiches dla Val Badia
Partezipanć: almanco 6 persones
----------------------------------------
NATÖRA Y CULTURA TLES DOLOMITES
Vijita cun acompagnadù tla Val di Morins
Danmisdé vijita al Museum Ladin Ćiastel de Tor cun audioguida y domisdé na roda acompagnada tla Val di Morins, olache an podarà odëi 8 morins a ega dlungia l’rü Seres dortorà te na manira ejemplara. Inće la ćialciara restrotorada po gnì vijitada.
Perioda: vigni mercui, dai 29.06 ai 07.09.2011
Danmisdè: dales 10 tl Museum Ladin Ćiastel de Tor
Domisdé: dales 14.30 ales 16 ca. - an se incunta sön plaza de dlijia da Longiarü
Prisc: 8,50 Euro
Prenotaziun obligatoria: Museum Ladin Ćiastel de Tor tel. 0474 52 40 20
------------------------------------
LE MUSEUM COMPAGN DLES FAMILIES, n domisdè por mituns
Le Museum Ladin Ćiastel de Tor organisëia na vijita ponsada por les families. Tratan che i geniturs se ćiara la mostra permanënta, él la poscibilité por sü mituns dla eté danter 4 – 7 agn da fà la roda dl museum cun personal spezialisé che sta pro i mituns. Al vëgn lit dant stories y liëndes dles Dolomites, portè dant la mostra permanënta te na maniera adatada ai mituns, aprofondì les tematiches tratades cun jüć y dessëgns.
Perioda: vigni jöbia, dai 07.07 ai 25.08.2011
Domisdé: dales 14.30 ales 17 tl Museum Ladin Ćiastel de Tor
Prisc: 4 Euro
Prenotaziun obligatoria: Museum Ladin Ćiastel de Tor tel. 0474 52 40 20
----------------------------------
SPERIMENTÈ CUN L’LINGAZ LADIN, pice curs de ladin por ghesć
Te n’ora y mesa de aurela cörta vëgnel portè dant n valgönes coriositês che reverda le lingaz y la cultura ladina. An impara da se saludé, se presentè, da pronunzié parores ladines y i.i. Cun jüć y te na manira lisiera vëgnel implü ćiamò portè dant n valgönes informaziuns sön la storia de nosc lingaz y sön la cultura de nüsc paîsc. En colaboraziun cun l’Istitut Ladin Micurà de Rü.
Perioda vigni vëndres: dal 01.07 ai 26.08.2011
Danmisdé dales 10.30 ales 12 tl Museum Ladin Ćiastel de Tor
Prisc: 4 Euro
Prenotaziun obligatoria: Museum Ladin Ćiastel de Tor tel. 0474 52 40 20
---------------------------------
MA CULTURA ... TL MUSEUM LADIN ĆIASTEL DE TOR
PROMOZIUN
1x vijita tl museum cun audioguida
1x vijita cun acompagnadù tla Val di Morins
1x domisdé tl museum por mituns
1x geologia dles Dolomites
1x curs de ladin por ghesć
Perioda: dai 29.06 ai 07.09.2011
Prisc: 15 Euro
Informaziuns: Museum Ladin Ćiastel de Tor tel. 0474 52 40 20
----------------------------------------
> Juntà l program da instà dl Museum Ladin
Museum Ladin
San Martin de Tor
telefonn 0474 524020,
web www.museumladin.it
as
