Politica | 11.07.2011 | 14:42

Jonta provinziela contra l smendrì dla populazion te vint chemuns

USP – Tla provinzia de Bulsan iel vint chemuns che manacia de smendrì la populazion. La Jonta provinziela ie (ncuei) ai 11 de lugio stata a una de lascé lauré ora studi ti singuli raions per pudëi pona tò pruvedimënc cuncrec da valorisé chemuns critics. A chësta maniera iel unì dat pro i proscimi vares per l program “Südtirol 2021”.

Riesc do la senteda dla Jonta provinziela à l presidënt Durnwalder fat al savëi che la situazion di chemuns dl Südtirol ne ie nia tan stleta n cont de resië de pierder populazion. Ma per schivé de majeri problems tl daunì iel debujën ntervenì nchin che l basta mëndri pruvedimënc che se lascia nce fé te curt tëmp. Aldò de na grupa de lëur resieia 21 chemuns de smendrì la populazion. I assessëures provinziei ie stai a una de lascé fé studi spezifics per i raions plu tuchei a na maniera da pudëi nce ntervenì.

Per pudëi miuré la situazion uelen lascé lauré ora ntervënc sun l svilup economich tres nvestimënc sun inuvazion y cumpetitività, na miëur coordinazion y culaburazion danter la politiches de ciamp (energia, sanità, scola y auter) cun istituzions locales. Pëis vëniel nce dat a n sistem de svilup local che se stiza sun la cunescënza.

“Ulon garantì n svilup balanzà danter i majeri zëntri y i pitli luesc, à dit Durnwalder, nscì saral de mpurtanza fundamentela pudëi ntervenì sun la nfrastrutures”.  Tl’analisa y valutazion dla situazions defrëntes uniral nia me tëut n cunsciderazion i chemuns singuli ma i raions tuchei.

Tl cajo dla val Venuesta auta, uelen nuzé miec l cuntat cun la Svizra che à na valuta sterscia. Chësta situazion messëssa cumpurté l’atratività turistica dla Venuesta auta y nce l’atratività di priejes dla firmes. “Cun l sustëni dl EOS dëssel tlo unì laurà ora n proiet per sustenì l’economia tla Venuesta” à dit Durnwalder.

as

Galaria dales fotografies

Assessëures ntan la senteda dla Jonta provinziela de Bulsan;