Atualità
Metà legislatura de Mussner/5: lëures publics y muvimënt sun i jëufs
Cun na mëndra bilanz a desposizion muessa nce se mudé l frabiché publich. Cualità, tenì ti ani, frabiché scëmpl deberieda cun l sparanië y nueva formes de finanziamënt ie l’urientamënt dl assessëur Florian Mussner prejentà (NCUEI) ai 4 de agost tl’ancunteda de metà legislatura a Sureghes. L plu adatà per i jëufs ie aldò dl assessëur n daz, nuzé i mplanc portamont y n di dla rodes n iede al mëns.
Mussner sënt de vester sun la drëta streda per i lëures publics: „fajon de bona proietazions, frabicon bën y aministron nce bën. Nosta pitla y gran firmes pieta bona cualità“ al dit a Sureghes. De bona esperienzes an fat a sëurandé lëures publics aldò dl prinzip dl priesc y dla cualità per arjonjer opres che tën ti ani.
„On udù che l se lascia frabiché cualità nce zënza spënder de plu“ à dit Mussner. La se trata de se nuzé de n’architetura scëmpla che se cunzentreie sun l essenziel y nsci possen arjonjer frabiches drët funziuneles y nce drët beles.
Al assessëur ti sta nce a cuer che la firmes da tlo giape da lëur tla provinzies ujines de Trënt, Belun y Tirol. „L suzed for inò che nosta firmes ne giapa nianca la documentazion per fé pea i cuncorsc tla provinzies ujines“ à dit Mussner. De chësc vies à l assessëur nce nunzià l parch tecnologich ulache l vën frabicà n toch al iede. La firmes muessa pona nce junté pro l savëi spezifich.
La rezeta per purté inant strutures publiches nce cun manco finanziamënt vëija Mussner tla cunzentrazion sun l essenziel, nuzé miec cie che ie bele unì frabicà y modiei de finanziamënt nueves. „La va de sparanië a frabiché y de lascé demez chël che ne muessa nia vester“ à dit l assessëur ai lëures publics. Tl daunì messeran se dediché mo de plu te de bona proietazions y lauré ora bën la dezijions. „L ne possa nia vester che ne son nia boni de proieté avisa l custimënt dla frabiches danora“ à dit Mussner sorissan che n ne puderà plu azeté variantes de proiet y custimënc sëuraprò.
N iede vala de nuzé mo de plu la puscions y la frabiches che ie bele tla mans dla Provinzia. „Sce l ie pona mpomo debujën de frabiché da nuef, adroven formes de finanziamënt nueves“ à dit l assessëur nunzian la Public Private Partnership y l project financing. Te tramedoi caji se tratela de udëi ora i vantajes per publich y privat per arjonjer na soluzion de finanziamënt deberieda.
Jëufs dla Dolomites
Nce n cont dla regulamentazion dl muvimënt sun i jëufs dla Dolomites à Mussner dat respostes. L à sorissa che tlo val debujën de na dezijion y che n ne possa nia daniëura spënjer la problematica. Si vijion tol ite trëi ponc prinzipei: n daz, nuzé i mplanc portamont y resservé un di al mëns per chëi dala rodes. L daz ne ie nia udù sciche forma per fé scioldi, ma de na pert de na vijion globela che lascia viver la mprejes y la stieres su per i jëufs. La va de abiné na soluzion che tën cont dl daunì y de n cër orden su per i jëufs. Debujën iel aldò de Mussner nce dl tenì pea da pert dl’autra provinzies.
L proiet de lueges dai auti y trasport publich sun i jëufs de Frea, Sella, Stelvio y Timia ne ie mo nia unì tratà te Jonta provinziela. Tlo fovel nce unì pensà a na streda dala rodes un Frea.
as
Galaria dales fotografies
Mussner: nueva formes de finanziamënt di lëures publics
- Scarica il file audio 771 kb
